लन्डन । बेलायतको राजधानी लन्डनबाट करिब तीन घन्टाको ड्राइभमा पुगिने सुन्दर, शान्त र हरियालीले भरिएको वेल्स राज्य आफ्नै ऐतिहासिक किल्ला, मौलिक संस्कृति र प्राकृतिक सौन्दर्यका कारण परिचित छ। यही वेल्सको राजधानी कार्डिफ शहरको मध्य भागमा नेपाली कला, संस्कृति र मौलिक पहिचान बोकेको दुईतले शोरुम छ ‘गणेशा ह्यान्डीक्राफ्ट्स’। कार्डिफ सिटी सेन्टरमा अवस्थित गणेशाको शोरुमभित्र प्रवेश गर्दा ग्राहकले काठमाडौंको असन र ठमेलको झल्को पाउँछन्। रंगीबिरंगी नेपाली परम्परागत तयारी पोशाक, आकर्षक कपडा, पछ्यौरी, टोपी, झोला, घर सजावटका सामग्री, चाँदीका गरगहना, वास्तविक रत्न, क्रिस्टल, सिङ्गिङ बाउल तथा विभिन्न हस्तकलाका वस्तुहरूले शोरुमलाई नेपाली मौलिकताको जीवन्त प्रदर्शनीजस्तै बनाएको छ। पछिल्लो समय वेल्समा नेपाली समुदायको उपस्थिति बढ्दै गएको छ।