लन्डन । गैरआवासीय नेपाली संघ (एनआरएनए) को संस्कृति तथा सम्पदा समितिको संयोजन र युनिटेक नेपालले व्यवस्थापनमा संचालन हुँदै आएको कार्यक्रम ‘एनआरएन द सिङगर’ मा बेलायतकी युक्ति विमली टप टेनमा पर्न सफल भएकी छन् ।
‘ए’ लेभल गरेकी १७ वर्षीय युक्तिले सानैदेखि नेपाली गीतसंगीतमा चासो राख्दै आएकी छन् । नेपाल र नेपालीको लागि केहि गर्नुपर्छ भन्ने भावना बोकेकी युक्तिले बेलायतमा आयोजना हुने नेपाली कार्यक्रममा पनि कहिलेकहीं आफ्नो प्रस्तुती दिंदै आएकी छन् । आफु जहाँ बसेपनि नेपाली भाषा र नेपाली संस्कृतिलाई बिर्सन नहुने युक्तिको धारणा छ ।
उनीसंगै टप टेनको सूची अन्तर्गत भिम शेर्मा लिम्बु – युएई, कर्मा दोंग तामांग – नर्वे, विष्णु क्षेत्री – नर्वे, लोकेन्द्र दुधराज – कतार, सुभाष चन्द्र पुन मगर – पोर्चुगल, प्रदिप कोयु राई – साउथ कोरिया, गुना मगर निशु – कतार, कृष्ण खवास – युएई, केदार कार्की – जर्मनी छन् ।
यसपछि टप फाएभ अन्तर्गतको प्रतिस्पर्धा गरिनेछ र तीमध्येबाट ग्राण्ड फिनालेको लागि प्रतिस्पर्धा हुनेछ । टप फाएभको लागि अक्टुबर ९ सम्म भोटिंग पार्टनर खल्ती डटकमबाट भोट गर्न सकिनेछ । आफूलाई विजयी गराउन सम्पूर्ण आफन्त तथा इष्टमित्रहरुलाई भोट गर्न युक्तिले आग्रह गरेकी छन्
ग्रान्ड फिनालेमा ५ जनाबीचको प्रतिस्पर्धामा सर्वाधिक भोट ल्याउनेले नै ‘एनआरएन द सिंगरको’ उपाधि जित्नेछन् । अक्टोबर ९ मा सेमिफाइनल (उत्कृष्ट १०) को प्रस्तुति प्रसारण गरेर फिनालेका लागि उत्कृष्ट ५ जनाको छनोट गरिने छ । फिनाले अक्टोबर १५ मा काठमाडौंमा हुने भएको छ ।
उपाधि जित्नले नगद रु ५ लाख, रनरअपले रु ३ लाख र सेकेन्ड रनरअपले रु १ लाख नगद पुरस्कारका साथै ट्रफि र प्रमाणपत्र पाउने छन् ।
‘खोजी एउटा उत्कृष्ट प्रवासी नेपाली आवाज’ को मूल नाराका साथ ‘एनआरएन द सिङगर’ को निर्णायक मण्डलमा वरिष्ठ गायक तथा सर्जक शम्भु राई नेपालबाट, शर्मिला बर्देवा यूकेबाट र रुपककुमार शाही अस्ट्रियाबाट रहेका छन् ।
पहिलोपटक आयोजना गरिएको रियालिटि शो ‘एनआरएन द सिङगर’ का लागि ३७ देशका तीनसय बढीको सहभागिता थियो, जसमध्येबाट उत्कृष्ट ४० जनालाई छनौट गरेर कार्यक्रमलाइ अगाडि बधाइएको थियो ।
