लन्डन । दुबईबाट इजरायलको तेल अभिभतर्फ उडेको फ्लाईदुबईको विमान ककपिटमा भएको हिंसात्मक घटनापछि साउदी अरबमा आकस्मिक अवतरण गरिएको छ।
उडान नम्बर एफजेड-१०७३ बुधबार दुबई अन्तर्राष्ट्रिय विमानस्थलबाट बेन गुरियन विमानस्थलका लागि प्रस्थान गरेको थियो।
उडानका क्रममा विमानले आपत्कालीन सङ्केत पठाएपछि मार्ग परिवर्तन गरी साउदी अरबको तबुकस्थित प्रिन्स सुल्तान बिन अब्दुलअजिज अन्तर्राष्ट्रिय विमानस्थलमा सुरक्षित अवतरण गरेको हो। विमानमा करिब १५० यात्रु सवार रहेको बताइएको छ।
इजरायली प्रधानमन्त्री बेन्जामिन नेतन्याहुले एक पाइलटले अर्का पाइलटमाथि छुरा प्रहार गरी विमान नै खसाल्ने प्रयास गरेको दाबी गरेका छन्। उनका अनुसार एक यात्रु र चालक दलका सदस्यले ककपिटमा प्रवेश गरी आक्रमण गर्ने पाइलटलाई नियन्त्रणमा लिएका थिए।
आरोपीलाई साउदी अधिकारीहरूले नियन्त्रणमा लिएर सोधपुछ गरिरहेका छन्। घटनाका क्रममा विमान अचानक तीव्र गतिमा तल झरेको र सामान्य आपत्कालीन अवस्था बाहिरको सङ्केत पठाएको उडान अनुगमन विवरणमा देखिएको छ।
विमान केही समय जोर्डनको हवाई क्षेत्रमा प्रवेश गरेपछि साउदी अरबतर्फ फर्किएको थियो। तबुक विमानस्थल सञ्चालकका अनुसार विमानका कप्तान र सहचालक दुवै घाइते भएका छन् र उनीहरूलाई उपचारका लागि अस्पताल लगिएको छ।
फ्लाईदुबईले उडानका क्रममा घटना भएको पुष्टि गरे पनि त्यसको विस्तृत कारण भने सार्वजनिक गरेको छैन; कम्पनीले सबै यात्रु सुरक्षित रहेको जनाएको छ।
घटनाको वास्तविक कारण र उद्देश्यबारे अनुसन्धान जारी छ। इजरायली अधिकारीहरूले यसलाई सम्भावित आतङ्कवादी कार्य भन्ने गरी तर्फबाट गरे पनि साउदी अधिकारी वा स्वतन्त्र निकायबाट यसको औपचारिक पुष्टि भइसकेको छैन।
