लन्डन । गायिका सुशिला गौतमको ‘गुल्मी चन्द्रकोट’ बोलको पन्चेबाजा गीतको म्यूजिक भिडियो सार्वजनिक भएको छ । सुशिला गौतम र रेशम निर्दोषको स्वर तथा इश्वर सिंहको संगीत रहेको यस गीतमा रविन लामिछानेको शब्द सृजना छ । म्यूजिक भिडियोमा विनोद भण्डारी र सन्जना गुरुङको अभिनय र स्वयं भण्डारीकै निर्देशन छ ।
गुल्मीको चन्द्रकोट, शान्तिपुर, टिमुरे डाँडा, डिब्रुङ देवी मन्दिर लगायतका पर्यटकीय स्थानलाई समेटेर दिनेश पराजुलीले छायाँकन गरेका छन् भने मनोज कार्कीको सम्पादन छ । गीतको म्यूजिक भिडियो गायिका सुशिलाले आफ्नै युट्युब च्यानलबाट सार्वजनिक गरेकी छन् ।
गुल्मीको शान्तिपुरमा जन्मिएकी चर्चित लोकदोहोरी गायिका गौतमले यसपटकको गीत आफ्नै जन्मभूमी सम्झिएर गाएको बताएकी छन् । साथै, गुल्मी जिल्लाको पर्यटन प्रवर्धन गर्न पनि म्यूजिक भिडियोले सहयोग पुग्ने उनको विश्वास छ ।
सांगीतिक कार्यक्रमका सिलसिलामा केही महिना अघि बेलायत आएकी सुशीलाले क्षेत्री समाज यूके र गुल्मी जिल्ला समाज यूकेको १६ औं वार्षिक भेला, क्याट यूकेले लन्डनमा गरेको च्यारिटी कार्यक्रमलगायत दर्जनौं सांगीतिक कार्यक्रम सकेर तिहार लगत्तै नेपाल फर्किएकी हुन् ।
दर्जनौं गीतमा आवाज दिएकी सुशिलाको पञ्चेबाजा ‘माइतीको माया’, तीजगीत ‘भुइं छोडेकी चरी’, ‘एक नजर लाइदेउ न माया’, ‘रातो भाले’ लगायत गीत दर्शकश्रोतामाझ लोकप्रिय छन् ।
म्यूजिक भिडियो-
