नेपाली मूलका पहिलो व्यक्ति बेलायती संसदमा उमेद्वार

Listen gurkha radio (गोर्खा रेडियो सुन्नुहोस)

लन्डन, तनहुँ जिल्लाको कमला बारीमा जन्मिएका डा. बच्चु कैलाश कैनी नेपाली इतिहाँसमै पहिलोपटक बेलायती संसदमा चुनाव लड्दै छन् । आगामी जुन ८ मा बेलायतमा हुन् गैरहेको संसदीय निर्वाचनमा बेलायतस्थित डाटफोर्ड काउन्सिलबाट डा. कैनी उमेद्वार चयन भएका हुन् । यस अघि पनि उनी सन् २०१५मा सोही काउन्सिलमा लेबर पार्टीबाट ४ वर्षका लागि काउन्सिलर पदमा निर्वाचित भएका थिए । यसपटक पनि प्रारम्भिक् चरणमा तीन जनाको उमेद्वारी परेको भएतापनि पहिलो चरणमा डेइजी पेजले स्वेच्छापूर्वक आफ्नो उमेद्वारी फिर्ता लिएपछि पार्टीले डा. कैनीलाई उमेद्वार बनाउने निर्णय गरेको हो । आउँदो मे ११का दिन कैनीले औपचारिक रुपमा उमेद्वारी दर्ता गर्ने तयारीमा छन् । विगत ५ वर्षदेखि लेबर पार्टीसँग सम्बन्धित रही सक्रिय रुपमा लागेका कैनीले केही समय पार्टीको स्थानीय ट्रेड युनियन संयोजकको रुपमा काम गरेका थिए । डा. कैनीले सन् २०१४मा म्यानचेष्टरमा सम्पन्न लेबर पार्टीको राष्ट्रिय महाधिवेसनमा डाटफोर्ड जिल्ला कमिटीबाट प्रतिनिधीका रुपमा महाधिवेसनमा भाग लिएका थिए । डा. कैनी हाल क्वीन एलिजाबेथ अस्पताल, लन्डनमा बरिष्ठ व्यवस्थापकको रुपमा कार्यरत छन । सामाजिक एवम् राजनैतिक क्षेत्रमा मात्र नभएर साहित्यिक क्षेत्रमा समेत कलम चलाउँदै आएका डा. कैनीले समसामयिक विषयमा खोजमूलक र रोचक शैलीका लेख, रचना लगायत कथा कविता समेत लेख्दै आएका छन् । उनका पिता स्व.मेघनाथ कैनी पनि नेपाली राजनीतिमा कहलिएका व्यक्ति हुन् जो नेपाली कांग्रेससँग आवद्ध थिए ।