धुर्मुस सुन्तलीबाट सरकार र नेताहरुले पनि पाठ सिक्नुपर्छ

गोर्खा रेडियो, भूकम्प पीडितहरुको लागि धुर्मुस सुन्तली फाउन्डेसनले निर्माण गरेको गिरानचौर एकीकृत नमूना बस्ती तिहारको पहिलो दिन अर्थात कागतिहारको दिन पारेर रास्ट्रपति विद्यादेवी भण्डारी लगायत धुर्मुस सुन्तालीका बा-आमाबाट समुदायलाई हस्तान्तरण गरेका छन् । दशैँ अगाडी नै हस्तान्तरण गर्ने योजना भएपनि मौसमको प्रतिकूलका कारण केहि ढिला हुन गएको थियो । हाँस्य कलाकारद्वय सिताराम कट्टेल (धुर्मुस) र कुन्जमा घिमिरे (सुन्तली) को पहलमा करिब ५ करोड १३ लाख ८५ हजार १ सय ८७ रुपैयाँको लगानीमा उक्त नमूना बस्ति निर्माण भएको हो । ६५ घर, पार्क तथा सामुदायिक भवन सहितको सो बस्ती निर्माण कार्यको लागि करिब ४ महिनामात्र लागेको थियो भने यस्तो बस्ती निर्माणको सपना देखेको एक वर्षभित्र नै धुर्मुस सुन्तलीले आफ्नो सपना पूरा गरेका छन । बस्ती बनाउन जनस्तरबाट ६ करोड १७ लाख १ हजार १ सय ३९ रुपैयाँ संकलन भएको थियो। कुल लागतमध्ये ४ करोड ५२ लाख ४४ हजार २ सय ८७ रुपैयाँ भूक्तानी भइसकेको छ । ६१ लाख ४ हजार ९ सय रुपैयाँ तिर्न बाँकी रहेको धुर्मुस सुन्तली फाउन्डेसानले जानकारी गराइएको छ । उक्त नमूना बस्ती हस्तान्तरण कार्यक्रममा रास्ट्रपति, उद्योगमन्त्री, संसद, लगायत कालाकार महजोडीको पनि उपस्थिति रहेको थियो । धुर्मुस सुन्तलीको यस कार्यलाई सबैले खुलेर प्रशंसा गरेका थिए भने यसबाट सबैले पाठ सिक्नुपर्ने पनि बताएका थिए । गाउँले हरुले त आफूहरुको लागि धुर्मुस सुन्तली भगवान नै आएको भनेका थिए । चाहेको खण्डमा जनस्तरबाट पनि देश विकास गर्न सम्भव हुन्छ भन्ने कुराको उनीहरुले प्रमाणित गरेका छन् । सरकार तथा नेताहरुद्वारा पनि भूकम्प पीडितहरुलाई पुर्याउन नसकिरहेको अवस्थामा उनीहरु एउटा नमूना बनेका छन् । दुइजना व्यक्तिको पहलमा त यस्तो बस्तीको निर्माण भयो भने जनताले चुनेर पठाएका ६०१ जना सांसद हरुले पनि यसैगरी आफ्नो कर्तव्य पूरा गर्ने हो भने थुप्रै बस्तीहरुको निर्माण हुनेथियो । तर यहाँ देश र जनताको बारेमा भन्दा आफ्नै व्यक्तिगत सुख सुविधाको लागि नै सरकारको समय ब्यतित भईरहेको हुँदा आफूले चुनेर पठाएको नेताहरुबाट जनताहरुले आवश्यक प्रतिफल पाउन सकेकाछैनन । थोपा थोपा मिलेर समुन्द्र बन्छ भन्ने कुरालाई धुर्मुस सुन्तलीले प्रमाणित गरिसकेका छन् तसर्थ यो पाठ सबैले सिकेर अगाडी बढ्ने हो भने देश विकास अवश्य सम्भव हुनेछ । बस्तीबाट देश बनाउने धुर्मुस सुन्तलीको सपाना साकार होस् र उनीहरुको कार्यबाट सबैलाई प्रोत्साहन र हौसला मिलोस ।