लन्डन, यदि मानिसमा जोस, जाँगर र लगनशीलता छ भने ढिलो चांडो उसले सफलता पाएरै छाड्छ । कहिंलेकाही हुने असफलताबाट हरेस खाने र तेसैलाई जिन्दगीको अन्तिम प्रयास ठान्ने हो भने पक्कै पनि अघि बढ्न सम्भव हुदैन । त्यस्तै बेलायतको डुरामस्थित सुपरड्रग स्टोरमा कार्यरत एकजना नेपाली महिलालाइ उदाहरण र प्रेरणाको रुपमा लिन सकिन्छ । बेलायतको निकै प्रचलित कम्पनी सुपरड्रगको विज्ञापनमा खेल्नको लागि करिब ८ सय स्टोरमा कार्यरत ब्यूटी थेरापिष्टहरुलाई पछी पार्दै आस्था भट्टराई उत्कृष्ट चयन भएकिछन । सन् १९६४ देखि यूकेमा व्यावसय संचालनमा ल्याएको सुपरड्रगले हाल आफ्नै स्टोरमा ब्यूटीसियन सम्बन्धि कारोवार पनि गर्दै आएकोछ । ब्यूटी एण्ड हेल्थसम्बन्धि सामाग्रीहरुको बिक्रेता गर्दै आएको उक्त कम्पनि बेलायतको दोस्रो ठूलो कम्पनी अन्तर्गत पर्दछ । वार्षिक ४० मिलियन पाउण्ड बराबरको मुनाफा कमाउंदै आएको यस कम्पनीले प्रेस्क्रिप्शन, हेल्थ चेक ,थ्रेडिंग, लेजर हियर र रिमुभलजस्ता सेवाहरु प्रदान गर्दै आएकोछ । सोहि कम्पनीमा विगत ४ वर्षदेखि कार्यरत आस्था भट्टराइ आफूले यति ठूलो कम्पनीमा विज्ञापन खेल्न पाउँला भनेर कल्पना पनि नगरेको भन्दै दङ्ग परेकीछन । काठमाडौँको शंखमूल घर भएकी आस्थाले नेपालकी चर्चित ब्यूटीसियन कमला श्रेष्ठसंग तालिम लिएकी छन् भने बेलायतमा आएर पनि ब्यूटीसियन सम्बन्धि थप तालिमहरु गरेकी छन् । घरमा बसेर पनि जीविकोपार्जन गर्न सकिने यो काम जानेको मानिसलाई काम पाउन पनि समस्या नहुने र सेल्फ इम्प्लोईको रुपमा पनि काम गर्न सकिने बताउछिन । आफू पनि यस पेशाबाट पूर्ण सन्तुष्टि भएको र अन्य महिला दिदीबहिनीहरुलाई पनि यस्तो किसिमको तालिमहरु गर्नको लागि सल्लाह दिन्छिन ।