पुष २१, पाँचथर इम्बुङ–७ कोल्बुङका एकै परिवारका चार सन्तान अपाङ्ग भएपछिको चरम पीडा भोग्दै भन्ने समाचार रासस, सेतोपाटी, इमेजखबर, कालिका एफ एम लगायत बाट गत पौष ९ गते प्रकाशन/ प्रशारण भएपछि बेलायतमा रहेका माधव रेग्मीबाट सहयोग स्वरुप तामाङ परिवारका लागि ५ हजार १ सय ८० रुपैया रकम प्रदान भएको छ। नेपाल पत्रकार महासंघको शाखा कार्यालयमा सोमबार आयोजित नेपाल पत्रकार महासंघ पाँचथरको शाखा कार्यालयमा एक कार्यक्रमका वीच उक्त रकम महाशाखाका शाखा अध्यक्ष लवदेव ढुंगानाले प्रदान गरेका थिए । इम्बुङ ७ का हर्कवीर तामाङका साहिंला छोरा महेन्द्रलाई उक्त रकम प्रदान गरिएको थियो । पोलियो रोगका कारण हर्कबिरका ४ सन्तान अहिले पनि अपांगको जिवन विताइरहेका छन् । चारै जना अहिले दिशा पिशाब पनि नियंत्रण गर्न नसक्ने अवस्थामा ओछ्यान परेका छन्। सहयोग रकम पाएपछि थोरै भएपनि राहत मिलेको महेन्द्रले वताएका छन् । रासस, सेतोपाटी इमेज लगायतमा तामाङ्ग परिवारको अपाङ्गता सम्बन्धी समाचार प्रकाशन भएपछि बेलायतवाट रेग्मीले समाचार प्रेषक तथा रासस एबं इमेज च्यानलका फिदिम स्थित संबाददाता जितेन्द्र भण्डारीलाई संपर्क गरी थोरै भएपनि राहत पुगोस भनेर आफुले सहयोग गर्न चाहेको र उक्त सहयोग तामांग परिवारसम्म पुऱ्याईदिन अनुरोध गरेका थिए। नवलपरासी, गैडाकोट नगरपालिका वडा नम्बर १ निवासी रेग्मी अहिले वेलायतमा अवस्थित बोल्टन विश्वविद्यालयमा समाजिक स्वास्थ सम्बन्धी बिषयमा बिद्यावारिधि गर्दैछन्। नेपाल पत्रकार महासंघ बेलायत शाखाका पार्षद समेत रहेका रेग्मी स्कोटलैंडको एक नेपाली सामाजिक संस्था नेपालीज हिमालयन एसोसिएशनमा समेत संलग्न रही अन्य सामाजिक हितका गतिबिधिमा पनि सामेल छन्।