लन्डन । तमुधिं यूकेको आयोजनामा हुने २४औं गोर्खा कप २०२६ को तयारी अन्तिम चरणमा पुगेको छ। यस वर्षको प्रतियोगितामा पुरुष, भेट्रान र महिला गरी जम्मा ५६ टोलीले प्रतिस्पर्धा गर्नेछन्।
संस्थाका खेलकुद सचिव तथा कार्यक्रम संयोजक क्याप्टेन दीपक घलेका अनुसार प्रतियोगितामा पुरुषतर्फ ३८, भेट्रानतर्फ १६ र महिलातर्फ २ टोली सहभागी हुनेछन्। गोर्खा कप नेपालबाहिर आयोजना हुने नेपाली समुदायको सबैभन्दा ठूलो खेलकुद र सामाजिक जमघटमध्ये एक मानिन्छ। सन् १९९६ मा ७-ए-साइड फुटबल प्रतियोगिताको रूपमा सुरु भएको गोर्खा कप हाल ९-ए-साइड स्वरूपमा थप व्यवस्थित र परिष्कृत हुँदै आएको छ।
यस वर्ष प्रतियोगिता बिहान ९ बजेदेखि राति ८ बजेसम्म सञ्चालन हुने आयोजकले जनाएको छ। पुरुषतर्फ विजेताले ३ हजार ५०० पाउन्ड, ट्रफी र प्रमाणपत्र प्राप्त गर्नेछन् भने उपविजेताले २ हजार पाउन्ड प्राप्त गर्नेछन्। भेट्रानतर्फ विजेता र उपविजेतालाई क्रमशः १ हजार ८०० पाउन्ड पुरस्कार प्रदान गरिनेछ। महिलातर्फ विजेताले ६०० पाउन्ड र उपविजेताले ४०० पाउन्ड प्राप्त गर्नेछन्। यसपटक ‘लिजेन्ड अफ द गोर्खा कप’ उपाधि पनि प्रदान गरिने भएको छ।
संयोजक घलेका अनुसार गोर्खा कपका मुख्य उद्देश्य नेपाली युवामा खेलकुदको विकास, भेटघाट, लागूऔषध दुर्व्यसन न्यूनीकरण, स्थानीय समुदायसँग समन्वय र सामुदायिक सहयोग हुन्। गत वर्ष प्राप्त सुझावलाई मध्यनजर गर्दै यस वर्ष व्यवस्थापनमा सुधार गरिएको छ।
प्रतियोगितामा प्रवेश शुल्क ५ पाउण्ड तोकिएको छ। कार र मिनीबस पार्किङ शुल्क १० पाउण्ड र कोच पार्किङ शुल्क १५ पाउण्ड निर्धारण गरिएको छ। आयोजकका अनुसार जम्मा २२ हजार टिकट छापिएको छ भने अनलाइनमार्फत पनि टिकट खरिद गर्न सकिनेछ।
तमुधिं यूकेले यस वर्षको गोर्खा कपका लागि करिब ३ लाख ५० हजार ६५० पाउण्डभन्दा बढी खर्च हुने अनुमान गरेको छ। कार्यक्रममा खाना, च्यारिटी, कपडा, आइसक्रिम लगायत १२६ वटा स्टल रहनेछन्। बालबालिकाका लागि विशेष खेल र फन फेयरको व्यवस्था पनि गरिएको छ।
आयोजकले प्रतियोगितास्थलमा मदिरा सेवन, ड्रोन उडाउन र हतियार बिक्री वितरण वा बोक्न पूर्ण रूपमा प्रतिबन्ध लगाएको छ।
यस वर्ष नेपालबाट अतिथि खेलाडी ल्याउन नसकिए पनि, स्कटल्याण्डमा फुटबल खेलिरहेकी नेपाली मूलकी উদियমান खेलाडी मेलिसा रेग्मी गोर्खा कपमा सहभागी हुने भएकी छन्। नेपालको चितवन, भरतपुरमा पुर्ख्यौली घर भएकी १५ वर्षीया मेलिसा स्कटल्याण्डको एबरडिनमा बसोबास गर्छिन्। उनी एबरडिन क्लबको युवा एकेडेमीमा स्ट्राइकरका रूपमा खेल्दै आएकी छन्। उनी एबरडिन यू-१६ एकेडेमी प्रोग्रामकी पहिलो खेलाडीसमेत मानिन्छिन्।
मेलिसाले सात वर्षको उमेरदेखि डाइस गर्ल्स फुटबल क्लबबाट फुटबल यात्रा सुरु गरेकी थिइन्। त्यसपछि उनले एबरडिन फुटबल क्लब लेडिजबाट यू-११ देखि यू-१६ सम्म ९ नम्बर जर्सीमा मुख्य स्ट्राइकरका रूपमा खेलेकी थिइन्। उनी स्कुल टोलीकी कप्तान पनि हुन्। मेलिसा स्कटिस स्कुल फुटबल एसोसिएसनको यू-१५ अन्तर्राष्ट्रिय टोलीमा समेत छनोट भएकी थिइन्। बीजीसी स्कटल्यान्ड यू-१५ गर्ल्स टोलीबाट वेल्सविरुद्ध खेल्दा उनले ह्याट्रिक गर्दै ‘प्लेयर अफ द म्याच’ सम्मानसमेत प्राप्त गरेकी थिइन्।
पत्रकार सम्मेलनमा, तमुधिं यूकेका अध्यक्ष जुमकाजी गुरुङले मिडियाकर्मी, प्रायोजक, सहयोगी, पदाधिकारी र समुदायका सबै सदस्यहरूलाई धन्यवाद दिँदै गोर्खा कपमा सहभागी हुन अनुरोध गरे। वरिष्ठ उपाध्यक्ष परशु गुरुङले स्वागत मन्तव्य राख्दै गोर्खा कप तमु समुदायको मात्र नभई सम्पूर्ण नेपाली समुदायको साझा कार्यक्रम भएको बताए।
कार्यक्रममा आमा समूहकी पूर्व महासचिव यशोदा गुरुङले आमा समूहलाई ४० वटा मफलर हस्तान्तरण गरिन्। समूहकी अध्यक्ष कमलादेवी गुरुङले ती मफलर ग्रहण गरिन्।
पत्रकार सम्मेलनमार्फत प्रतियोगिताको टिम ड्र पनि गरिएको थियो। हिराप्रसाद गुरुङ, कुमार घले र दिवान गुरुङले टिम ड्र गराए। कार्यक्रममा पूर्व स्पोर्ट्स सेक्रेटरी क्याप्टेन देव घले, ह्याम्पसायर इकाइ अध्यक्ष, महासचिव डा. विशाल गुरुङलगायतलाई सम्मान गरिएको थियो।
तमुधिं यूकेका महासचिव डा. विशाल गुरुङले स्वास्थ्य र सुरक्षा जानकारी सहित कार्यक्रम सञ्चालन गरे, जबकि सचिव विमल गुरुङले धन्यवाद ज्ञापन गर्दै प्रायोजकहरूको बारेमा जानकारी दिए।
कार्यक्रममा संस्थापक अध्यक्ष मीनप्रसाद गुरुङ, पूर्व अध्यक्षहरू कमल गुरुङ, हरि गुरुङ, ज्ञाम गुरुङ, हितकाजी गुरुङ, रामचन्द्र गुरुङ ‘सूर्जे’, ट्रष्टी सूर्य गुरुङ, आमा समूहकी अध्यक्ष कमलादेवी गुरुङलगायत पदाधिकारी र सदस्यहरूको सहभागिता थियो।
आयोजकका अनुसार प्रतियोगिता नजिकिँदै जाँदा सहभागी टोलीहरूले अभ्यासलाई तीव्र बनाएका छन्। खेलाडीहरूले शारीरिक तन्दुरुस्ती, टोलीगत समन्वय र रणनीतिक तयारीमा विशेष ध्यान दिइरहेका छन्। आयोजकले गोर्खा कप २०२६ ले नेपाली समुदायमा खेलकुद, एकता र स्वस्थ प्रतिस्पर्धाको भावनालाई अझ मजबुत बनाउने विश्वास व्यक्त गरेको छ।
आयोजकले सहभागी सबै टोली, खेलाडी र समर्थकहरूलाई प्रतियोगितास्थलमा स्वागत गर्न आफूहरू उत्साहित रहेको बताएको छ।
