लन्डन । तमुधिं यूकेले नेपाल पत्रकार महासंघ यूकेको नवनिर्वाचित कार्यसमितिलाई सम्मान गर्ने भएको छ ।
यही अगष्टमा अयोजना हुन गइरहेको नेपाली मेलाबारे जानकारी दिन आयोजित पत्रकार सम्मेलनको अवसर पारेर विमला सेने नेतृत्वको नयाँ कार्यसमितिलाई सम्मान गर्न लागिएको हो ।
अगष्ट १८ तारिख आइतबार तमुधिं यूकेले आफ्नै भवनमा गर्न लागेको पत्रकार सम्मेलनमा छैटौं अधिवेशनबाट निर्वाचित कार्यसमितिलाई सम्मान तथा बधाई कार्यक्रम गर्न लागिएको तमुधिं यूकेका मिडिया संयोजक एसके गुरुङले बताए ।
बेलायती नेपाली समाजमा अग्रणी संस्थाको रुपमा परिचित तमुधिं यूकेले ‘हाम्रो संस्कृति, हाम्रो पहिचान, हाम्रो गौरव’ भन्ने नाराकासाथ हरेक वर्ष गर्दै आएको नेपाली मेला यो वर्ष यही अगष्ट २५ तारिख गर्दैछ ।
तमुधिं यूकेले हरेक वर्ष गोर्खा कप पछि दोस्रो ठुलो इभेन्टका रुपमा नेपाली मेला गर्दै आएको छ ।
