लन्डन । ‘राष्ट्रिय एकताको प्रतीक वीर नेपाली सेना’ बोलको गीतको म्यूजिक भिडियोको एक विशेष कार्यक्रमबीच सार्वजनिक गरिएको छ । आर्मी अफिसर्स क्लब काठमाडौँमा नेपाली सेनाका प्रधान सेनापति प्रभुराम शर्माले मंगलबार विमोचन गर्नुभएको हो ।
नेपाली सेनाले विगतमा गरेका क्रियाकलाप र योगदानको चर्चा गरिएको गीतमा युवा संगीतकार राजेन्द्र बजगाइले संगीत दिएका छन् । गायिका गीता पाण्डे, गायक सुभाष तिम्सिनाको युगल स्वर रहेको गीतमा कोरस गायन नारायण थापा, रवीन्द्र लामिछाने, राज कुमार आले मगर, राजीव परियार हेमन्त रामजेली मगरको छ । गीतको संगीत संयोजना दिनेश सुनामले गरेका छन् ।
नेपाली सेनाका उच्च तहका अधिकृतहरूका साथै नेपाली गीतसंगीत र कलासाहित्यका विशिष्ट स्रष्टाहरूको उपस्थिति रहेको यस कार्यक्रममा राष्ट्रिय भावना र स्वाधीनताको अभिव्यक्ति रहेको विमोचित गीतको छायाचित्रसमेत प्रस्तुत गरिएको यस कार्यक्रममा यस गीतका स्रष्टाहरूलाई प्रमुख अतिथिले सम्मानपत्र पनि प्रदान गर्नुभएको थियो ।
नेपाली सेनाको इतिहास प्रस्तुत गरिएको यस गीतमा नेपाली सेनाको औचित्य, आवश्यकता र उद्देश्यलाई यस गीतको विषयगत पक्षमा समेटिएको छ ।
