लन्डन । महानायक राजेश हमाल शनिबार राति लन्डन आइपुगेका छन् । करिब एक महिनाको लागि बेलायत आएका हमालले बेलायतका नेपाली समुदायसंग अन्तरक्रिया गर्ने र उनीहरुका कथाव्यथालाई नियाल्ने छन् ।
बेलायतमा रहंदा उनी विभिन्न स्थानमा आयोजना गरिने च्यारिटी कार्यक्रममा सहभागी हुनेछन् । सेप्टेम्बर ४ को सांझ हमालको सहभागितामा लन्डन ब्ल्याकहिथस्थित एभरेष्ट इन रेष्टुरेन्टमा ‘ब्ल्याक टाई गाला डिनर’ हुँदैछ । हेल्प नेपाल नेटवर्क यूकेको आयोजनामा हुने कार्यक्रमबाट संकलन हुने कोष हेल्प नेपाल नेटवर्कद्वारा काभ्रेमा सञ्चालित बाल गृहलाई सहयोग गरिनेछ ।
त्यस्तै, सेप्टेम्बर ९ को साँझ लन्डन साउथ ह्यारोस्थित गोल्डेनसिप रेष्टुरेन्टमा तय ‘मिट एन्ड ग्रिट विथ महानायक’ मा हमालले भाग लिनेछन्।त्यसबाहेक उनले मिडल्यान्ड र स्कटल्यान्डसम्म पुगेर पनि स्थानीय नेपालीहरु भेट्ने कार्यक्रमको तयारी भइरहेको छ ।
बेलायत बसाइपछि उनी युरोपका विभिन्न मुलकको भ्रमणमा जाने छन् । विदेशमा रहेका नेपालीहरुको कथा सुन्ने र विशेष टेलिभिजन सिरिज ल्याउने उद्घोष गरेका अभिनेता हमालले सोही अभियानको प्रारम्भिक चरणमा बेलायत र युरोपका विभिन्न देशहरुको भ्रमण गर्न लागेका हुन् ।
महानायक हमालले विदेशमा बसेर विभिन्न क्षेत्रमा राम्रो सफलता पाएका नेपालीहरुको कथा आम नेपालीमाझ ल्याउनु आवश्यक रहेको भन्दै उनीहरुको सकारात्मक कथा धेरैका लागि प्रेरणादायी हुने बताएका छन् । त्यतिमात्रै नभएर उनीहरुसंग भएको अनुभव र दक्षतालाई नेपालसंग जोड्नुपर्ने र त्यसबाट देशले कसरी फाइदा लिने भन्नेतर्फ सोच्नुपर्ने उनको धारणा छ ।
