लन्डन । पर्वत वेलफेयर सोसाइटी यूकेले २० औं वार्षिकोत्सव तथा वार्षिक भेटघाट कार्यक्रम भव्य रुपमा मनाउने तयारी गरेको छ । आउँदो अगष्ट २१ तारिख आइतबार दिउसो अल्डरसटस्थित एम्पायर हलमा कार्यक्रमको आयोजना गर्न लागिएको पर्वत वेलफेयर सोसाइटी यूकेका उपाध्यक्ष सुरज पौडेलले बताए ।
पछिल्ला दुईवर्षयता कोरोना महामारीका कारण कुनै पनि भौतिक गतिविधि नभएकाले यसपटकको २० औं वार्षिकोत्सव तथा वार्षिक भेटघाट कार्यक्रमलाई विशेष संगीतमय बनाइने आयोजकले बताएका छन् । कार्यक्रममा नेपालबाट आएका ख्याति प्राप्त कलाकारहरुको उपस्थितिमा सांस्कृतिक कार्यक्रम, दिदीबहिनीका लागि तीज गीत तथा नाचगान र रात्री भोज व्यवस्था गरिनेछ ।
कार्यक्रमलाई सफल पार्न समस्त बेलायतवासी पर्वतेली तथा गैर पर्वतेलीहरुलाई संस्थाका अध्यक्ष नेत्र आलेले आग्रह गरेका छन् । पर्वत वेलफेयर सोसाइटी यूकेले नेपालमा आइपर्ने विभिन्न समस्यामा सहयोगको हातेमालो गर्दै आएकोछ ।
नेपाली कला संस्कृति परम्परा र रीतिरिवाजको जगेर्ना गर्ने उद्देश्यले विभिन्न मौलिक सांस्कृतिक कार्यक्रमको आयोजना गर्दै आएको छ ।
