लण्डन । एनआरएन यूकेको नयाँ कार्यसमिति चयन गर्न आज सोमबार मध्यान्ह १२ बजे देखि अनलाइनको माध्यमबाट मतदान शुरु भएको छ । निर्वाचन भोलि मंगलबार मध्यान्ह १२ बजेसम्म जारी रहने निर्वाचन समितिले जनाएको छ। प्रविधिको माध्यमबाट सहज हुने अनुमान धेरैको भएपनि सोचे जस्तो नभएको धेरैको बुझाइ छ ।
व्यक्तिगत इमेलमा पठाइएको लिंकमा क्लिक गरेर मतदान गर्नुपर्ने प्रावधान रहेको र लिंक क्लिक गरेपछि लामो समय प्रतीक्षालयमा पालो पर्खिएपछि मात्र मतदान गर्न पाइने छ । एनआरएन यूके इलेक्सन २०२१ ‘नेशनल’ र एनआरएन यूके इलेक्सन २०२१ ‘इंग्ल्याण्ड’ को लागि छुट्टाछुट्टै मतदान व्यवस्था गरिएकोले इमेलमा पाठाइएका दुईवटा अलग अलग इमेलमा क्लिक गरेर मतदान गर्नुपर्नेछ ।
पहिलोपटक अनलाइन प्रणालीमार्फत मतदान व्यवस्था गरिएकाले आम मतदातामाझ केही असजिलो र झन्झट हुने धेरैले पूर्वानुमान गरेका थिए । पूर्व निर्धारित कार्यतालिका अनुसार ३१ जुलाई शनिबार नै निर्वाचन हुनुपर्ने भएपनि निर्वाचन समितिले प्राविधिक कारण जनाउँदै दुई दिन पर सारेको थियो ।
बेलायतमा बसोबास गर्ने नेपालीमध्ये पन्जीकृत सदस्यता लिएका ११ हजार ३ सय ६५ जना मतदानमा सहभागी हुन योग्य छन् । अध्यक्ष, उपाध्यक्षहरु, महिला उपाध्यक्ष, महासचिव, सचिव, कोषाध्यक्ष, सह कोषाध्यक्ष, महिला संयोजक, युवा संयोजक तथा सदस्य गरी सबै पदमा निर्वाचन हुँदै छ । निर्वाचन परिणाम अगष्ट ५ तारिखसम्ममा आउने बताइएको छ ।
अध्यक्ष र महासचिवमा तीन, तीन जनाको उम्मेदवारी परेको छ भने अन्य पदहरुमा दुई, दुई जनाको उम्मेदवारी परेको छ ।
सन् २०२१–२०२३ कार्यकालका लागि अध्यक्षमा प्रेम गाहा मगर, रोजिना प्रधान राई र दीपक श्रेष्ठले उम्मेदवारी दिएका छन् । अनलाइन भोटिंगको लागि ‘च्वाइस भोटिंग’ कम्पनीलाई जिम्मा दिइएको छ ।
