लन्डन । एक दशकअघि ‘प्याँस’ नामक गीति एल्बमबाट आफ्नो सांगीतिक यात्रा तय गरेकी गायिका राईको ‘तिम्रो तृष्णा’ बोलको गीतबाट पुनरागमन भएको छ । उक्त गीतमा उनलाई भ्वाईस अफ नेपालका फाईनलिष्ट बिकाश लिम्बुले साथ दिएका छन् । गायिका स्वयंको शब्द सृजना रहेको सो गीतमा वरिष्ठ गायक तथा संगीतकार तारा प्रकाश लिम्बुले संगीत दिएका छन् ।
बेलायत र नेपालमा छायांकन गरिएको गीतको म्यूजिक भिडियोको सम्पादन एवं निर्देशन संचारकर्मी कुशल श्रेष्ठले गरेका छन् र नेपालतर्फ सुरज तामाङले निर्देशन गरेका हुन् । करिब डेढ दशक यता ब्रिटिश गोर्खा सेनामा सेवारत साथै सामाजिक अभियन्ता मण्डल थेवे, पारु राई, बिकाश लिम्बु र बृक्षा लिम्बुले यस गीतमा अभिनय गरेका छन् ।
यसैगरी मेकअपमा बिपना गुरुङ, सह–छांयाकन आशिष श्रेष्ठ र रंग संयोजन नविन निरौलाले भूमिका निर्वाह गरेका छन् । नेपाल नै संगीतको आधारभुत शिक्षा लिई सकेकी गायिका राई बिगत तीन वर्ष यता ‘दि लण्डन कलेज अफ म्युजिक’ अन्तर्गत क्लासिकल पियानो सम्बन्धि कक्षा लिई रहेकी छिन् ।
आफ्नो पारिवारिक जिम्मेवारीको कारण आफ्नो सांगीतिक यात्रालाई औपचारिक रुपमा निरन्तरता दिन नसकेको उनले स्वीकारोक्ति छ । यद्धपि आफूलाई मन पर्ने पेशा भएको र ब्रिटिश आर्मीमा कार्यरत श्रीमान दिलिप राईको सहयोग र प्रोत्साहनले पुन: यस क्षेत्रमा लाग्न प्रेरित गरेको राईले बताइन् ।
पाँचथर नेपालमा जन्मिएकी पारु विगत ९ वर्षदेखि सपरिवार बेलायतमा सैन्य जीवन बिताई रहेकी छन् ।
‘तिम्रो तृष्णा’ म्यूजिक भिडियो हेर्नुहोस् :
