गैरआवासीय नेपाली संघ (एनआरएनए) ले देशका विभिन्न शहरमा स्वास्थ्य सम्बन्धी हटलाइन (टेलिफोन सेवा) शुरु गरेको छ।
कोभिड १९ को महामारीमा परेका विरामीहरुको उपचारमा सहयोग गर्ने उद्देश्यले बिहीबारदेखि देशैभरी हटलाइन सेवा संचालन गरिएको गैरआवासीय नेपाली संघ अन्तर्गतको स्वास्थ्य समितिका संयोजक डा. सन्जिव सापकोटाकाले जानकारी दिए ।
नेपाल मेडिकल एशोसियन र डाफे किएरको सहकार्यमा संघले काठमाडौं, जनकपुर, धरान, नेपालगन्ज, विराटनगर, राजविराज, धनगडी क्षेत्रमा मोवाईल हटलाइन सेवा सुरु गरेको हो। हटलाइन सेवाको लागि डा. शिव श्रेष्ठ, डा. प्रमोद जोशी, डा. रितेश थापा, डा. राम नरेश पण्डित, डा. बिपेश आचार्य, डा. प्रदीप मिश्र, डा. दिनेश श्रेष्ठ, डा. रइस पोखेल, डा. राजेन्द्र चौधरी, डा. राजन शर्मा लगायत करिब दुई दर्जन चिकित्सकहरु परिचालन गरिएको गैरआवासीय नेपाली संघले जनाएको छ ।
नेपाल मेडिकल एशोसियनका बरिष्ठ उपाध्यक्ष डा. शिव श्रेष्ठले संघसंगको सहकार्यमा सुरु भएको हटलाइन सेवाले कोभिड १९ का विरामीलाई राहात पुग्ने विश्वास व्यक्त गरे । हटलाइन शुरु भएको केही घण्टामानै दर्जनौ कल आउन थालेको उनले जानकारी दिए ।
कोभिड १९ सम्बन्धी समस्या परेका बिरामीले सिधैं ती चिकित्सकहरुको मोवाईल नम्बरमा वा ९८८००३५००० मा सम्पर्क राख्न सक्ने छन् । यसअघि संघले विदेशस्थित नेपालीहरुको सहयोगको लागि हेटलाइन सेवा सुरु गरेको थियो ।
