लन्डन ।गैर आवसीय नेपाली संघ यूकेको नेतृत्वमा नेपाल पत्रकार महासंघ युरोप र एनआरएनए एनसीसी आयरल्याण्ड, डेनमार्क, अष्ट्रीया र स्पेनले सामाजिक जागरण तथा मानवीय सहयोग क्रियाकलापमा हातेमालो गर्दै शनिबार संयुक्त्त रूपमा भर्चुअल कार्यक्रमको आयोजना गरेको छ ।
‘गैरआवासीय युवाको पहिचान, राष्ट्र निर्माणमा युवा अभियान’ भन्ने नारा सहितको उक्त कार्यक्रमका प्रमुख अतिथिमा युवा तथा खेलकुद मन्त्री जगत बहादुर विश्वकर्माको उपस्थिति थियो भने गैरआवासीय नेपाली संघका केन्द्रीय अध्यक्ष कुमार पन्त र युवा संयोजक हिमाल गुरुङको पनि सहभागिता थियो ।
प्रमुख अतिथि मन्त्री विश्वकर्माले नयाँ नेपाल निर्माणमा युवाहरुको सहभागितामा अपरिहार्य रहेको भन्दै युवाहरुले आफ्नो शिप र ज्ञान बोकेर मातृभूमि फर्कन आग्रह गरे । साथै नेपाल सरकारले युवाहरुका लागि अवसरका श्रृजनाहरु गरेको बताएका थिए ।
कार्यक्रमको प्यानलिष्टमा नेपालका चर्चित सामाजिक अभियान्ता रमेश प्रसाईं, ब्लाईण्ड रक्सकी संस्थापक श्रृष्टि केसी र डेनमार्कबाट कलरफुल स्याडोजकी संस्थापक अनुजा गौतमले आफ्ना विचार तथा क्रियाकलापको बारेमा उल्लेख गरेका थिए । प्राबिधिक समस्याले गर्दा प्रसाईका धारणा समावेस हुन सकेनन् ।
महिला भएकै कारण र त्यसमा पनि अपाङ्ग हुनुपरेको अवस्थामा समाजले हेर्ने दृस्टीकोण बदल्नुपर्ने र राज्यले आत्मनिर्भर, काम र शिक्षामा समान अवसर दिइनुपर्ने भन्दै अनुजा गौतमले दृष्टिबिहीन भएकै कारण विभिन्न स्थानमा भोगेको तितो अनुभब बताएकी थिइन । एनआरएनको युरोपियन भेलाबाट पाएको माया ,सहयोग र समर्थनको प्रसंशा गर्दै उनले सबैको सानो त्याग र सहयोगले नेत्रहिन समुदायमा ठुलो प्रेरणा मिल्ने बताईन ।
चुनौती, अवसर र परिवर्तनले युवालाइ अघि बढ्न सहयोग पुग्ने बताउंदै युवाहरुलाई मन मुटुदेखि नै सपना देख्न ब्लाइन्ड रककी सृस्टि केसीले आग्रह गरिन । समुन्द्रमा एक थोपा पानी बिलाएर जाने तर पातमा राख्दा तेसैले चमक दिने भएकाले सकारात्मक सोच राख्नुपर्ने शृष्टिले बताइन ।
कार्यक्रम पूर्णरुपमा कलरफुल स्याडोजको प्रोजेक्टको लागि आर्थिक सहयोग संकलन गर्ने लक्ष्य रहेको बताइएको छ । कबोल गरिएको रकम डिसेम्बर २५ तारिख भित्र एनआरएन एनसीसी डेनमार्कको खातामा जम्मा गरिने बताईएको छ । कार्यक्रममा ५ वटै एनसीसीका पदाधिकारीहरु र अन्य धेरै सामाजिक अभियान्ताहरुको सहभागिता रहेको थियो ।
एनआएएन यूके अध्यक्ष पुनम गुरुङको अध्यक्षतामा संम्पन्न उक्त कार्यक्रममा एनसीसी आयरल्यान्डका अध्यक्ष मिलन छन्त्यालले स्वागत मन्तव्य प्रस्तुत गरेका थिए । कार्यक्रमको संचालन अष्ट्रीयाका युवा संयोजक दिनेश वैद्यबारले गरेका थिए । युरोप-अमेरीका, मध्यपूर्ब – एसियाप्यासेफिक क्षेत्रका विभिन्न देशका एनसीसी अध्यक्ष लगायत अग्रज एनआरएनकर्मी तथा पत्रकारहरुको उल्लेख्य सहभागिता रहेको थियो ।
एनसीसीहरुको पहलमा हुने यस्ता क्रियाकलापले भावी दिनमा अन्य एनसीसीहरुलाई पनि अभिप्रेरित गर्नुका साथै युवाहरुले पनि साझा मुद्दाहरुमा कसरी एकजुट हुन सकिन्छ भन्ने प्रयोगको रुपमा यस कार्यक्रमलाई लिईएको एनआरएनए आईसीसी सदस्य रामशरण सिमखडाले बताए । युवाहरुद्वारा आयोजित यस्ता कार्यक्रमले सामाजिक अभियानमा ठूलो भूमिका रहने सहभागीहरुको धारण छ ।
एनआरएन आइसीसी केन्द्रीय अध्यक्ष कुमार पन्त, नर्डिक रिजनका राजदूत युवनाथ लम्साल, एनआरएन आइसीसी युवा संयोजक हिजमाल गुरुङ र पत्रकार महासंघ युरोप शाखाका अध्यक्ष केजिन राई लगायतले शुभकामना मन्तव्य राखेका थिए ।
