लन्डन । हाल बेलायतमा बस्दै आएकी नयाँ पुस्ताकी दीप्ता थापाको स्वरले सजिएको ‘यो जीन्दगी’ बोलको गीतको म्यूजिक भिडियो सार्वजनिक भएको छ । बेलायतका लागि नेपाली राजदूत डा गुर्गाबहादुर सुवेदी लगायतको टोलीले भर्चुअलको माध्यमबाट गीतको विमोचन गरेका हुन् ।
कार्यक्रममा भर्खरै मात्र बीबीसीबाट प्रशारण हुँदै गरेको ‘मास्टर सेफ प्रोफेशनल यूके प्रतियोगिता २०२०’ को सेमिफाइनलमा पुगेका सेफ सन्तोष शाह पनि उपस्थित भएका थिए । निकै मार्मिक शब्दहरु रहेको यस गीतमा दीप्ताको आवज पनि उत्तिकै प्रशंसनीय छ । सांगितीक माहोलमा हुर्किएकी गायिका दीप्ताका पिता दीपक थापा पनि बेलायतका एक स्थापित गायक हुन् भने आमा सुनिता गौतमको पनि नृत्यमा उत्तिकै दख्खल छ ।
संजीत देउजाको शब्द रहेको यस गीतमा शिखर सन्तोषको संगीत रहेको छ । भिडियोमा कोरियोग्राफरको भूमिका गायिका दीप्तिकै आमाले निभाएकी छन् । कुशल श्रेष्ठको छायाँकन, निर्देशनमा र सम्पादनमा तयार भएको यस गीतको म्यूजिक भिडियोमा नविन निरौलाले रंग संयोजन गरेका छन् ।
म्यूजिक भिडियोलाई अन्जानीया प्रोडक्सन यूके मार्फत दीपक थापाले बजारमा ल्याएका छन् । पछिल्लो समयमा नेपाली गीत संगीतप्रति बेलायत निवासी नयाँ पुस्ताका युवायुवतीको आकर्षण बढ्दै गएको छ ।
हेर्नुहोस दीप्ता थापाको ‘यो जीन्दगी’
