अफ्रिका । चौथो एनआरएनए अफ्रिका क्षेत्रीय बैठक २०२१ को अप्रिल २ र ३ तारिखमा हुने भएको छ । आगामी डिसेम्बरमा हुने भनिएको उक्त बैठकलाई वर्तमान परिस्थितिका कारण अर्को वर्षमा सार्ने एनआरएनए राष्ट्रिय समन्वय समितिका अध्यक्ष र पदाधिकारीहरुको जूम बैठकले निर्णय गरेको हो ।
अर्को वर्ष आयोजना गरिने सो कार्यक्रम अफ्रिकास्थित जाम्बियाको राजधानी लुसाकामा भौतिक उपस्थितिमा आयोजना गरिने भएको छ । बैठक आयोजना गर्न अफ्रिका क्षेत्रीय संयोजक रोशन थापाको संयोजकत्वमा एक आयोजक समिती गठन गर्ने समेत निर्णय गरियो ।
बैठकमा अफ्रिकामा नेपालीका समस्या , अफ्रिकाबाट नेपालमा रेमिटान्स र लगानी , अफ्रिकाको स्वास्थ्य समस्या , नेपाली साहित्य र संस्कृति , अफ्रिकामा नेपाली महिलाको समस्या र मानव तस्करी लगायतका विषय माथी विभिन्न सेसनहरु आयोजना हुनेछन ।
त्यसै गरि अफ्रिका स्वास्थ्य संयोजक डा सरिता पान्डेको प्रस्ताव अनुसार अन्तरराष्ट्रिय स्वास्थ्य समितिको सहयोगमा अफ्रिकामा नेपाली हरुको स्वास्थ्य स्थिति माथी निकट भविष्यमा नै एक कार्यक्रमको आयोजना गर्ने निर्णय गरियो ।
बैठकले अफ्रिकाको मरिशस र आइभोरी कोस्टमा बढदो नेपालीको संख्या र समस्यालाई ध्यान राख्दै एनआरएनए एनसीसी गठन गर्न पहल गर्ने निर्णय गरियो । साथै अफ्रिकामा अझै पनि मानव तस्करी बढदै गइरहेको र तस्करीबाट पीडित नेपालीहरुको समस्या बढदै गइरहेकोले त्यसको निराकरणका लागि नेपाली दूतावास र नेपाल सरकार सँग समन्वय गरि प्राथमिकता का साथ आवश्यक कार्य गरिने समेत निर्णय गरियो ।
एनआरएनए अफ्रिकाका क्षेत्रीय संयोजक रोशन थापाको अध्यक्षतामा सम्पन्न बैठकमा घाना , युगान्डा , तान्जानिया , केन्या , सेसेल्स , कङ्गो , जाम्बिया र दक्षिण अफ्रिकाका अध्यक्षहरुका साथै एनआरएनएका पूर्व कोषाध्यक्ष हिक्मत थापा , अफ्रिका हेल्थ संयोजक डा . सरिता पान्डे लगायत एनआरएनएका पदाधिकारी हरुको समेत उपस्थिति रहेको थियो ।
