काठमाडौँ । नेपालमा २४ घन्टाभित्र अहिलेसम्मकै सबैभन्दा धेरै कोरोना भाइरस संक्रमित पुष्टि भएको छ ।
गएको २४ घन्टामा १ हजार १६ जनामा कोरोनाको पुष्टि भएको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले जानकारी दिएका छन् ।
पछिल्लो २४ घन्टामा १३ हजार ४ सय ८१ जनामा परीक्षण गरिएको थियो । योसंगै नेपालमा कुल संक्रमितको संख्या २८ हजार २ सय ५७ पुगेको छ ।
हाल सक्रिय संक्रमितको संख्या १० हजार ५ सय ६३ रहेको स्वास्थ्य तथा जनसंख्या मन्त्रालयले जनाएको छ ।
बितेको २४ घण्टामा थप ८५ जना डिस्चार्ज भएका छन् भने हालसम्म डिस्चार्ज हुनेको संख्या १७ हजार ५ सय ८० पुगेको छ । हाल १३ हजार ९ सय २६ जना क्वारेन्टाइनमा रहेका छन् ।
नेपालमा कोरोना भाइरसका कारण पछिल्लो २४ घण्टामा ७ जनाको मृत्यु भएको छ । मृत्यु हुनेमा काभ्रे, मोरङ, नवलपरासी, धनुषा, बाँके र कास्कीका १–१ जना पुरुष तथा तनहुँकी एक महिला रहेको मन्त्रालयका प्रवक्ता डा जागेश्वर गौतमले जानकारी दिए ।
योसँगै नेपालमा मृत्यु हुनेको कुल संख्या १ सय १४ पुगेको छ ।
