सोल । दक्षिण कोरियामा कोरोनाभाइरसबाट एकैदिनमा मार्च महिनापछिकै सबैभन्दा धेरै संक्रमित भएका छन् । अधिकारीहरूले दिएको जानकारीअनुसार गत मार्चदेखि अहिलेसम्ममा दैनिक संक्रमित भएकामध्ये पछिल्लो २४ घण्टामा संक्रमितको सङ्ख्या सबैभन्दा धेरै देखिएको छ ।
उनीहरूका अनुसार दक्षिण कोरियामा पछिल्लो २४ घण्टामा २७९ जना नयाँ संक्रमित भेटिएका छन् । योसँगै दक्षिण कोरियामा कोरोनाभाइरसबाट संक्रमित भएकाहरूको कुल सङ्ख्या १५ हजार ३८१ पुगेको छ । कोरियाली रोग नियन्त्रण केन्द्रले आइतबार सार्वजनिक गरेको विवरणअनुसार दक्षिण कोरियामा कोरोनाका कारण अहिलेसम्म ३०५ जनाको मृत्यु भएको छ ।
अधिकारीहरूका अनुसार गत मार्च ८ मा एकैदिनमा अहिलेसम्मकै सबैभन्दा धेरै ३६७ जना संक्रमित भएका थिए । कोरोनाभाइरसबाट संक्रमित भएकाहरूको सङ्ख्या बढेकाले दक्षिण कोरियामा उच्च स्वास्थ्य सतर्कता अपनाइएको छ भने कतिपय प्रतिबन्धात्मक व्यवस्था लागु गरिएको छ ।
पछिल्लो समयमा भेटिएका नयाँ संक्रमितमध्ये २५३ जना राजधानी सोलका मात्रै रहेको रोग नियन्त्रण केन्द्रले जनाएको छ । संक्रमण फैलिन नदिनका लागि सरकारी तथा स्वास्थ्य अधिकारीहरूले चर्च, नर्सिङ् होम, विद्यालय, रेष्टुरेन्टलगायतमा विषेश ध्यान दिएका छन् ।
देशका अन्य मुख्य सहरहरू बुसान, डेगुलगायतमा पनि संक्रमण फैलिएका विवरणहरू आइरहेका छन् । ती ठाउँहरूमा गत फेब्रअरी र मार्चमा कोरोनाभाइरसको संक्रमणका केन्द्रविन्दुहरू भएका थिए ।
जहाँ दैनिक सयौँ नयाँ नयाँ संक्रमितहरू भेटिने गरेका थिए । संक्रमितहरूको सङ्ख्याका आधारमा दक्षिण कोरियाली सरकारले आम नागरिकका गतिविधिमा कहिले कडाइ गर्ने र कहिले खुकुलो पार्ने कार्य गरिरहेको छ ।
