काठमाडौँ । नेपालमा थप ४ सय ६४ जनामा कोरोना भाइरस संक्रमण पुष्टि भएको स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले जानकारी दिएका छन् ।
शुक्रबार आयोजित नियमित प्रेस ब्रिफिङका क्रममा पछिल्लो २४ घन्टामा ४ सय ६४ जना नयाँ संक्रमित फेला परेको जानकारी दिएका हुन् । योसँगै हालसम्म नेपालमा कूल संक्रमितको संख्या २२ हजार २ सय १४ पुगेको छ ।
यसैगरी पछिल्लो २४ घन्टामा मुलुकभरबाट थप ४ सय २५ जना डिस्जार्ज भएका छन् । हालसम्म १५ हजार ८ सय १४ जना संक्रमित निको भएर घर फर्किएका छन् ।
नेपालमा अहिले सक्रिय संक्रमित सङ्ख्या ६ हजार ३ सय ३० रहेका छन् । हाल नेपालमा ६ हजार ३ सय ३० जना आइसोलेसनमा उपचाररत छन् । २४ घन्टामा ७ हजार ९ सय २६ पीसीआर परीक्षण भएको प्रवक्ता गौतमले बताए ।
थप ५ जनाको मृत्यु
नेपालमा कोरोना भाइरस (कोभिड १९) को संक्रमणबाट थप ५ जनाको मृत्यु भएको स्वास्थ्य तथा जनसंख्या मन्त्रालयले पुष्टि गरेको छ ।
स्वास्थ्य तथा जनसंख्या मन्त्रालयले आयोजना गरेको नियमित प्रेस ब्रिफिङमा मन्त्रालयका प्रवक्ता डा.जागेश्वर गौतमले पर्सा जिल्लाका ३ जना, सर्लाही र सिरहाका एक–एक जना गरी पाँच जनाको मृत्यु भएको बताए ।
योसँगै हालसम्म नेपालमा कोरोना भाइरसको संक्रमणबाट मृत्यु हुनेको संख्या ७० पुगेको छ ।
