काठमाडौं । नेपालमा कोरोना भाइरस (कोभिड १९) संक्रमितको संख्या निरन्तर रुपमा बढ्दै गैरहेको छ । पछिल्लो २४ घन्टामा थप ३ सय ८१ जना नयाँ संक्रमित थपिएका स्वास्थ्य मन्त्रालयका प्रवक्ता डा. जागेश्वर गौतमले जानकारी दिएका छन् । योसँगै नेपालमा कूल संक्रमितको संख्या २१ हजार ३ सय ९० पुगेको छ ।
मन्त्रालयका अनुसार पछिल्लो २४ घण्टामा ७ हजार ८ सय ५९ जनाको स्वाब परीक्षण गरिएको छ । हाल नेपालमा ९ हजार ९ सय २५ जना क्वारेन्टिनमा छन् । यसैगरी सक्रिय संक्रमित संख्या ६ हजार ६ सय ६४ रहेका छन् । पछिल्लो चौबीस घण्टामा १ सय ३० जना संक्रमित निको भएर घर फर्केका छन् । हालसम्म १५ हजार १ सय ५६ जना संक्रमित निको भएर घर फर्किएका छन् ।
थप दुई जनाको मृत्यु
स्वास्थ्य तथा जनसंख्या मन्त्रालयका अनुसार पर्सामा थप २ जनाको कोरोनाका कारण मृत्यु भएको छ । मन्त्रालयका प्रवक्ता डा. जागेश्वर गौतमका अनुसार मृत्यु हुनेमा पर्साको पोखरिया ९ का १८ वर्षीया किशोरी र वीरगञ्ज ५ का ४६ वर्षिय पुरुष रहेका छन् । उपचारका लागि नेशनल मेडिकल कलेज लैजाने क्रममा बाटोमै मृत्यु भएकी किशोरीको स्वाब परीक्षण पोजिटिभ देखिएको हो । तेस्तै मधुमेहका रोगी वीरगंजका पुरुषमा ज्वरो र खोकीको समस्या देखिएपछि अस्पताल भर्ना गरिएको थियो । उनको स्वाब परीक्षण पोजिटिभ देखिएको हो । योसंगै नेपालमा कोरोना संक्रमणका कारण मृत्यु हुनेको संख्या ६० पुगेको छ ।
