दिल्ली । अन्तरराष्ट्रिय मैत्री दिवसको अवसर पारेर नेप्लिज स्टुडेन्ट एसोसियशन दिल्ली विश्वविद्यालयमा अध्ययनरत मानविकी संकाय अन्तर्गतका विद्यार्थीहरुद्वारा दिल्ली युनिभर्सिटी स्टुडेन्टस् युनियनको सहकार्यमा ‘नेपाल-भारत मैत्री वृक्षारोपण २०२०’ सम्पन्न भएको छ । समारोहमा पवित्रताको प्रतिक मानिने पाम र पीपलको विरुवा रोपिएको थियो । नेपाल-भारत दुई देशबीचको मैत्री सम्बन्धलाई अझ बढी सुदृढ एवं मजबुत बनाउने उद्देश्यले कार्यक्रमको आयोजना गरेको आयोजकले बताएका छन् ।
रेशम कुमार गैरेको अध्यक्षतामा बिहीबार आयोजित उक्त समारोहमा नेप्लिज स्टुडेन्ट एसोसियशन दिल्ली विश्वविद्यालयका पूर्व सल्लाहकार तथा (WOSY) का पूर्व अन्तर्राष्ट्रिय सचिव सन्दीप राणा र दिल्ली विश्वविद्यालयका रिसर्चर स्कोलर आनंद श्रीवास्तव प्रमुख अतिथी रहेका थिए ।
यसैगरी कार्यक्रममा दिल्ली युनिभर्सिटी स्टुडेन्टस् युनियनका अध्यक्ष अक्षित दहिया, सह-सचिव शिभांग खरवाल, उपाध्यक्ष प्रदिप तनवार, पूर्व अध्यक्ष, तथा सलाहकार, एन.एस.एडीयू आनन्द मिश्र र दिल्ली युनिभर्सिटी स्टुडेन्टस् युनियनका विदेश विभाग अध्यक्ष प्रमिशा लुइंटेल लगायतका विशिष्ट व्यक्तिहरुलाई पनि आमन्त्रित गरिएको थियो ।
नेपाल भारतबीचका प्रमुख नेताहरुको राजनैतिक तीक्ताताका कारण पछिल्लो समयमा दुवै देशबीच केहि विवाद उत्पन्न हुँदै आएकोछ । तर यस्ता राजनैतिक विवादका कारण दुवै देशका जनता जनताबीचमा भने कुनै पनि असर पर्न नहुने धारणा व्यक्त गरिएको छ । प्राचिन कालदेखि भौगोलिक, आर्थिक, सामाजिक र संस्कृतिक सम्बन्धका रुपमा बाँधिएका यी दुवै मुलुकबाट आफूहरुले सकारात्मक अपेक्षा राखेको पनि उनीहरुले बताए ।
दुवै देशबीच विद्दमान सम्बन्ध र रहनसहन एक आपसमा मिल्दोजुल्दो रहेको र ‘वसुदैव कुटुम्बकम’ अर्थात ‘संसार एक परिवार हो’ भन्ने संकल्पका साथ अघि बढ्दै आएको र यो मूल मन्त्रलाई सबैले एकसाथ पालना गर्दै जानुपर्ने बताएका छन् । लामो समयदेखि नंङ्ग र मासुको सबन्धको रुपमा चली आएको नेपाल भारतबीचको सम्बन्धलाई भविष्यमा अझ बढी प्रगाढ बनाउनुपर्ने धारणा व्यक्त गरिएको थियो ।
