रियो डि जानेरो । ब्राजिलमा २४ घन्टायता मात्र करिब ६९ हजार जनामा कोरोना भाइरसको सङ्क्रमण देखिएको छ । गएको २४ घन्टामा एक हजार ५ सय ९५ जनाको कोरोना भाइरसका कारण निधन भएको छ ।
योसँगै ब्राजिलमा अब कोरोना भाइरसबाट मृत्यु हुनेको सङ्ख्या ९० हजार नाघेको छ । ब्राजिलमा कोरोना संक्रमणबाट मृत्यु हुनेको सङ्ख्या ९० हजार १ सय ३४ पुगेको स्वास्थ्य अधिकारीहरूले जानकारी दिएका छन् ।
संक्रमितको सङ्ख्या कम्तीमा पनि २५ लाख पुगेको पनि ब्राजिलका स्वास्थ्य अधिकारीहरूले जनाएका छन् । बिहीबार दिएको जानकारीअनुसार यहाँका ९० हजार भन्दा बढीले कोरोनाकै कारण ज्यान गुमाएका छन् ।
ब्राजिल अमेरिकापछि सबैभन्दा बढी कोरोना प्रभावित देश हो । यहाँ अझै ठूलो सङ्ख्यामा नागरिक संक्रमित भएको आशङ्का गरिएको छ । तर पनि परीक्षणको सङ्ख्या बढाउनुपर्ने उनीहरूको भनाइ छ ।
कतिपयले ब्राजिलका राष्ट्रपति जैर बोल्सेनारोले कोरोनाको संक्रमणलाई गम्भीरताका साथ नलिएका कारण यस्तो अवस्था आएको बताएमा छन् । ब्राजिलमा संक्रमण सुरु भएको दिनमा लकडाउन गरिएको थिएन ।
ब्राजिलका राष्ट्रपति जैर बोल्सेनारोले लकडाउनको विरोध गर्नेहरूलाई समर्थन गरिरहेको आरोप लगाइएको थियो । यसै कारण ठूलो सङ्ख्यामा संक्रमण फैलिएको बताउने गरिएको छ ।
हाल ब्राजिलमा दैनिक ५० हजारभन्दा बढी मानिस संक्रमित हुने गरेका छन् ।
