नयाँ दिल्ली । भारतमा कोरोनाभाइरसबाट दैनिक संक्रमितको सङ्ख्या बढ्दै जानेक्रममा एकै दिनमा ३७ हजारभन्दा बढी कोरोना भाइरस संक्रमित थपिएका छन् ।
सरकारी अधिकारीहरूले मङ्गलबार दिएको जानकारीअनुसार पछिल्लो २४ घण्टामा भारतमा ३७ हजार १ सय ४८ जना कोरोना भाइरस संक्रमित थपिएका हुन ।
केन्द्रिय स्वास्थ्य तथा परिवार कल्याण मन्त्रालयले एकैदिनमा ५ सय ८७ जनाको कोरोनाका कारण मृत्यु भएको पनि जनाएको छ ।
त्यसैसँगै भारतमा कोरोनाकै कारण मृत्यु भएकाहरूको सङ्ख्या अहिलेसम्म २८ हजार ८४ पुगेको अधिकारीहरूले जानकारी दिएका छन् ।
योसँगै भारतमा अहिलेसम्म कोरोना भाइरसबाट संक्रमित भएकाहरूको सङ्ख्या ११ लाख ५५ हजार १ सय ९१ पुगेको अधिकारीहरूले जनाएका छन् ।
भारतमा अहिले पनि ४ लाख दुई हजार ५ सय २९ जना संक्रमित अवस्थामै रहेका छन् भने ७ लाख २४ हजार ५ सय ७८ जना संक्रमणमुक्त भएका छन् ।
कोरोनाबाट भारतमा सबैभन्दा धेरै प्रभावित भएको महाराष्ट्र प्रदेशमा ३ लाख १८ हजार ६ सय ९५ जना संक्रमित भएका छन् भने संक्रमणका कारण १२ हजार ३० व्यक्तिको मृत्यु भएको छ ।
त्यसपछि तमिलनाडुमा एक लाख ७५ हजार ६ सय ७८ संक्रमित रहेका छन् । राजधानी समेत रहेको दिल्ली प्रदेशमा १ लाख २३ हजार ७ सय ४७ कोरोना भाइरस संक्रमित रहेका छन् ।
