लन्डन । आन्दोलनरत भूतपूर्व गोर्खा सैनिक संघ (गेसो) ले नेपाल सरकारमाथि पनि रिट दायर गरेको छ । सिनियर सिटिजनलाई सम्मानस्वरूप दिंदै आएको सामाजिक सुरक्षा भत्ता कटौती गर्ने नेपाल सरकार मन्त्री परिषद्को बैठकद्वारा गरिएको निर्णय विरुद्ध गेसोले उक्त कदम चालेको हो ।
सामाजिक सुरक्षा भत्ता कटौती गरि विदेशी सेनामाथि विभेद गरेको भन्दै बेलायती सेना, भारतीय सेना र सिंगापुर पुलिसको तर्फबाट साउन ५ गते सयुक्त रुपमा सर्वोच्च अदालतमा रिट दायर गरिएको छ । समग्र गोर्खाहरुको अधिकारको निमित्त कानूनी लडाई लड्ने उद्देश्यले भूतपूर्व गोर्खा सैनिक संघ (गेसो) ले नेपाल सरकारलाई विपक्षी बनाइ रिट दायर गरेको गेसोका सभापति कृष्णकुमार राईले जानकारी दिए ।
हालै मात्र नेपाल सरकारले विदेशी सेनामा काम गरेवापत पेन्सन पाउँदै आइरहेकाहरुलाई नेपालमा उपलब्ध वृद्धभत्ता तथा सामाजिक सुरक्षा भत्ता लगायतका सुविधाहरु कटौती गर्ने निर्णय गरेको थियो । सरकारको यस निर्णयले विदेशी सेनामाथि विभेद गरेको गेसोले बताएको छ । ‘यो एउटा राष्ट्रिय मुद्दा हो, हाम्रो विजय अवश्य हुनेछ’ गेसोका अध्यक्ष राईले भने ।
गेसोले विगत तीन दशकदेखि न्यायिक समानताका लागि बेलायत विरुद्ध आन्दोलन गर्दै आएको छ । यस अवधिभित्र गेसोले थुप्रै उपलब्धि समेत हात पारेको छ ।
