काठमाडौँ । नेपालमा कोरोना भाइरस (कोभिड १९) को संक्रमणबाट थप एक शिशुको निधन भएको छ ।
म्याग्दी जिल्ला धौलागिरी नगरपालिकाको वडा नम्बर ४ का ४९ दिनका शिशुको असार १७ गते साँझ काठमाडौंको शिक्षण अस्पतालमा मृत्यु भएको हो ।
योसँगै नेपालमा कोरोनाका कारण मृत्यु हुनेको सङ्ख्या ३१ पुगेको स्वास्थ्य तथा जनसङ्ख्या मन्त्रालयका प्रवक्ता प्रा.डा. जागेश्वर गौतमले जानकारी दिएका छन् ।
घाँटीमा समस्या देखिएपछि असार ९ गते अस्पताल भर्ना भएका शिशुको शल्यक्रियाअघि पीसीआर परीक्षण गर्दा रिपोर्ट पोजिटिभ आएको थियो ।
पछिल्लो २४ घण्टामा देशभर थप ४ सय ७३ जनामा कोरोना संक्रमण देखिएको छ ।
यसैगरी नेपालमा सङ्क्रमित हुनेको सङ्ख्या १४ हजार ५ सय १९ पुगेको मन्त्रालयले जानकारी दिएको छ ।
जसमध्ये १ सय ९ महिला र ३ सय ६४ पुरुष रहेका छन् । गएको २४ घन्टामा ४ हजार ५ सय ३७ जनामा कोरोनाको परीक्षण गरिएको छ ।
हालसम्म कूल २ लाख ३७ हजार ७ सय ६४ जनामा कोरोना परीक्षण गरिएको स्वास्थ्य मन्त्रालयले जनाएको छ । तेस्तै बिहीबार ६ सय ६४ जना डिस्चार्ज भएर घर फर्किएका छन् । योसंगै डिस्चार्ज हुनेको संख्या ५ हजार ३ सय २० पुगेको छ ।
