लन्डन । हंगकंगमा बसोबास गर्ने ब्रिटिश नेशनल ओभरसिज (बीएनओ) पासपोर्ट भएकाहरुसहित झन्डै ३० लाख नागरिकले ब्रिटिश सिटिजनसिपको लागि आवेदन गर्न सक्ने भएका छन् ।
पूर्व ब्रिटिश उपनिवेश रहेको हंगकंगमा बसोबास गर्ने नागरिकहरुको आधारभूत स्वतन्त्रताको बारेमा प्रधानमन्त्री बोरिस जोन्सनले चासो व्यक्त गरेका छन् । प्रधानमन्त्रीका अनुसार शुरुमा उनीहरुलाई बेलायतमा बस्न र काम गर्न पाउने अधिकार दिइनेछ, त्यसपछि उनीहरुले नागरिकता (सिटिजनसिप) को लागि आवेदन दिन सक्नेछन्।
यसबारेमा बेलायतका विदेशमन्त्री डोमिनिक राबले सांसदहरुलाई विस्तृत रुपमा जानकारी गराएका छन् । बेलायतको पूर्व उपनिवेश रहेको हंगकंगलाई सन् १९९७ पछि त्यहाँको स्वायत्ततामाथि जोखिम पुर्याएको र कानूनी दायित्वको उल्लंघन गरेको भन्दै राबले बेइजिंगलाई चेतावनी दिएका छन् । तर चीनले भने आफ्नो आन्तरिक मामला भन्दै अन्तरराष्ट्रिय रुपमा गरिने आलोचनालाई अस्विकार गर्दै आएको छ ।
जुलाई १ तारिखबाट हंगकंगले सुरक्षासम्बन्धी नयाँ कानून लागू गरेको छ । उक्त नयाँ कानून विद्रोही तथा आतंकवादी गतिविधीमा संलग्न हुनेमाथि लक्षित छ । नयाँ व्यवस्थाले ‘एक देश, दुई प्रणाली’ अन्तर्गत सन् १९८५ मा बेलायत र चीनबीच गरिएको संयुक्त हस्ताक्षरसहितको सम्झौताको उल्लंघन भएको बताइएको छ । जुन सम्झौताअनुसार कम्तिमा ५० वर्ष सम्म केहि निश्चित स्वतन्त्रतालाई सुरक्षित कायम राख्नुपर्ने उल्लेख छ ।
हंगकंगमा झन्डै ३ लाख ५० हजार जति ‘ब्रिटिश नेशनल ओभरसिज’ (बिएनओ) पासपोर्ट होल्डरहरु छन् । उनीहरुबाहेक अन्य २६ लाख मानिसहरु पनि ब्रिटिश सिटिजनसिपको सुविधाका लागि लागि योग्य ठहरिनेछन् । वर्तमान अवस्थामा सबैले ६ महिनाको लागि बेलायत प्रवेश गर्न पाउनेछन् ।
सन् १९८० मा विशेष व्यवस्थासहितको ब्रिटिश नेशनल ओभरसिज( बिएनओ) पासपोर्ट प्रदान गरिएको थियो । तर हाल त्यस्ता पासपोर्ट होल्डरका सबै सुविधा कटौती गरेर ६ महिनासम्मको लागि बेलायत प्रवेश गर्न पाउने सुविधामा मात्र सिमित गरिएको छ ।
