भारत सारकारले सर्वाधिक लोकप्रिय मोबाइल एप्लिकेशन ‘टिकटक’ लगायतका ५९ वटा एप्लिकेशनहरुमाथि प्रतिबन्ध लगाएको छ । भारत र चिनियाँ सेनाबीच लद्दाख र चीन जोड्ने सीमा क्षेत्र ‘लाइन अफ एक्च्युल कन्ट्रोल’मा हिंसात्मक झडप भएको दुई सातापछि भारतले चीनसँग सम्बन्धित ‘मोबाइल एप्लीकेशनमाथि प्रतिबन्ध लगाएको हो ।
भारतको सूचना प्रविधि मन्त्रालयले सूचना प्रबिधि ऐन, २००९ को अनुच्छेद ६९ ‘ए’को अधिकार प्रयोग गरी उक्त निर्णय गरेको छ । सो धारामा भारत सरकार वा उसका कुनै पनि अधिकार प्राप्त सरकारी पदाधिकारीलाई भारतको सार्वभौमिकता, अखण्डता, राष्ट्रिय सुरक्षा, छिमेकीहरुसँगको सम्बन्ध तथा जनजीवनमा खलल पार्ने खालका लागेमा त्यस्ता कुराहरुमाथि प्रतिबन्ध लगाउन सकिने व्यवस्था छ ।
भारतमा मात्रै टिकटकका १० करोड सक्रिय प्रयोगकर्ताहरु रहेको बताइएको छ । टिकटकलगायतका मोबाइल एप्लिकेसनहरुमा प्रतिबन्ध लगाइएपछि भारतमा हज्जारौं भारतीयहरुले जागिर गुमाउने खतरा पैदा भएको छ ।
भारतमा टिकटक, शेयर इट, वी च्याट, वेइबो, क्वै, यूसी ब्राउजर, शैन, क्लेश अफ किंग, डीयू बैटरी सेभर, हेलो, लाइकी, भाइरस क्लिनर, सी एम ब्राउजर, रोम्वे, क्लब फैक्ट्री लगायतका मोबाइल एप्लिकेसनहरुमा प्रतिबन्ध लगाइएका छन् ।
