गोर्खा अनलाइन रेडियो
लन्डन । नेपालको कला संस्कृति र परम्परालाई जगेर्ना गर्ने उद्देश्य स्वरूप प्रवासमा थुप्रै विधाका साहित्य कृतिहरुको सृजना भएको छ । साहित्यिक सृजनामा डायस्पोरामा बस्ने नेपालीहरुको महत्वपूर्ण भूमिका रहँदै आएको छ । हालसम्म प्रवासी नेपालीहरुद्वारा प्रकाशित साहित्यिक कृतिको कुनैपनि ऐतिहाँसिक लेखनको तयार गरिएको पाइदैन ।
प्रवासी नेपाली साहित्यलाई प्रा.डा. खगेन्द्रप्रसाद लुइँटेल (त्रिवि, नेपाली केन्द्रीय विभाग, कीर्तिपुर) को पहलमा ‘डायस्पोराको नेपाली साहित्य’ को ऐतिहाँसिक साहित्य संकलनको तयारी भैरहेको छ । साहित्यको इतिहाँस लेखनबिना कृतिको मूल्यांकन अधुरो हुने डा. लुइँटेलको धारणा छ ।
‘डायस्पोराको नेपाली साहित्य’ को ऐतिहाँसिक साहित्य संकलनको काम लगभग अन्तिम चरणमा पुगेको हुँदा संसारका विभिन्न मुलुकमा छरिएर रहेका नेपाली साहित्यकारहरूलाई एक हप्ताभित्र आवश्यक विवरण पठाउन अनुरोध गरिएको छ ।
आफ्नो विवरण पठाउँदा नाम (वास्तविक र साहित्यिक), बसोबास रहेको देश, प्रथम प्रकाशित रचना (प्रकाशन स्रोत–पत्रिकाको वर्ष, अङ्क, साल, महिनासहित), प्रकाशित कृति (विधागत रूपमा– कविता (गीत, गजल, मुक्तक, हाइकु), कथा, उपन्यास, नाटक, निबन्ध), प्रकाशन सालसहित (सकेसम्म कृति नभए कृति पाइने ठाउँ) उल्लेख गर्नुपर्नेछ ।
विवरण पठाउँदा प्रा.डा. खगेन्द्रप्रसाद लुइटेल, त्रिवि, नेपाली केन्द्रीय विभाग, कीर्तिपुर वा इमेल- drkhalu@yahoo.com मा पठाउन सकिनेछ ।
साहित्य अनुसन्धान सम्बन्धमा तथ्याङ्क संकलनको लागि सहयोगगर्न बेलायतस्थित लेखक तथा कानूनविद गोविन्द बेलवासेले पनि अनुरोध गरेका छन् । भविष्यको लागि अभिलेखको रुपमा रहने र साहित्य सृजनामा चासो राख्नेहरुको लागि अझ बढी सहजता मिल्ने बेलवासे धारणा रहेको छ ।
