गोर्खा अनलाइन रेडियो

लण्डन । कोरोना भाइरस (कोभीड १९) को संक्रमणबाट बेलायतमा एकजना भूपू गोर्खाको निधन भएको छ । बेलायतको फार्नबरोमा बस्दै आएका८३ वर्षीय भूपू गोर्खा बुद्धबल गुरुङको बुधबार राती स्थानीय ‘फ्रिमली पार्क अस्पताल’मा उपचारकै क्रममा निधन भएको हो । उनलाई गत सोमबार उनलाई अस्पताल भर्ना गरिएको थियो ।

कोरोना ‘पोजिटिभ’ देखिएकी उनकी श्रीमतीलाई भने घरमै ‘आइसोलसन’ मा बस्न लगाइएको थियो र अहिले उनको स्वास्थ्यस्थिति सामान्य रहेको बताइएको छ । मृतक गुरुंग दुई छोराहरुका साथमा बेलायतमा बस्दै आएका थिए । सन् २००९ देखि बेलायत बस्दै आएका गुरुंगका दुई छोरा र एक छोरी छन ।

गोरखा जिल्लाको सिरानचोक गाउँपालिका ७ काप्रे स्थायी घर भएका गुरुङलाई धेरै पहिला प्यारालाइसिस भएको र उनको नियमित फिजियो गरिंदै आएको पारिवारिक स्रोतले जानकारी दिएको छ । हालसम्म बेलायतमा कोरोनाको संक्रमणबाट झन्डै डेढ दर्जन नेपालीहरुले ज्यान गुमाइसकेको तथ्यांक छ । जसमध्य अधिकांश मृत्यु हुनेमा भूपू गोर्खाहरु रहेका छन् ।