नरेन्द्र बस्नेत
लन्डन । युरोपियन युनियनबाट बेलायतको बहिर्गमन अर्थात ब्रेक्जिटको तयारीमा लागेका बेलायतवासीहरुको ध्यान यतिबेला राजपरिवार प्रति केन्द्रित हुन् पुगेको छ । विश्वमा नै लोकप्रिय मानिएको बेलायती राजपरिवारप्रति यतिबेला बेलायतको मात्र हैन संसारकै ध्यानाकृष्ट भएको छ । बेलायतको राजगद्दी उत्तराधिकारीको छैटौं वरियताक्रमा रहेका राजकुमार ह्यारी र उनकी श्रीमती मेगनले राजपरिवारको वरिष्ठ सदस्यको भूमिकाबाट अलग रहने घोषणा गरेपछि राजदरबारप्रति अन्तर्राष्ट्रिय ध्यान केन्द्रित बन्न पुगेको हो ।
सन् २०१८ मा ड्युक एन्ड डचेस अफ ससेक्सको उपाधि प्राप्त गरिसकेका राजकुमार दम्पतीले बकिङघम राजदरबारसंग सरसल्लाह नगरिकनै बेलायत र उत्तरी अमेरिकामा स्वतन्त्र जीवन बिताउने घोषणा गरेका थिए । उनीहरुको घोषणापछि महारानी एलिजावेथ द्वितीयाले राजकुमार ह्यारी, ड्युक अफ क्याम्ब्रिज राजकुमार विलियम र प्रिन्स अफ वेल्स् राजकुमार चाल्र्स लगायतका राजपरिवारका वरिष्ठ सदस्यहरूसंग छलफल गरेकी थिइन् । लामो समयदेखिको प्रयास र पछिल्लो समयको छलफलपछि आफ्नो नाती र उनको परिवारको लागि रचनात्मक र सहयोगी मार्ग भेटेको भन्दै रानीले खुशी व्यक्त गरेकी थिइन् ।
राजकुमार दम्पतीले भने आफ्नो पहिलो सन्तान आर्ची ह्यारिसनको पठनपाठन तथा नयां कल्याणकारी काम सुरु गर्न यस्तो निर्णय गरेको बताउंदै आएका छन् । तर, राजपरिवारका अन्य सदस्यहरूसंग राजकुमार ह्यारी र मेगनको सम्बन्धमा तिक्तता आएको खबर बेलाबखत आउने गरेका थिए ।
बेलायतका स्थानीय मिडियामा समेत ह्यारी र दाई विलियमबीच सम्बन्ध बिग्रिएको समाचार आएको थियो । ह्यारी दम्पतिले सञ्चारमाध्यमले आफूहरुलाई लक्षित गरिरहंदा दबाब र तनाव महशुस भएको भन्दै उनीहरुले सञ्चार माध्यमलाई मुद्दा समेत दायर गरेका थिए । ह्यारीले आफ्नी आमा स्वर्गीय डायनालाई जस्तै पीडा दिन खोजेको आरोप लगाएका थिए ।
बकिङघम राजदरबारले शनिबार गरेको घोषणा अनुसार आउंदो वसन्त ऋतुदेखि उनीहरुको ‘हिज वा हर रोयल हाइनेन्’ (HRH) भन्ने पदवी खोसिनेछ । तर ह्यारी ड्युक अफ ससिक्स् र मेगन डचेस अफ ससिक्स् रुपमा भने रहिरहनेछन् । वीन्डजोर बर्कसायरस्थित आफ्नो निवास फ्रगमोर कटेज भने उनीहरुको बेलायतको पारिवारिक घरको रुपमा रहनेछ । उक्त घर मर्मतका लागि करदाताबाट लिएको २.४ मिलियन पाउन्ड उनीहरुले फिर्ता गर्ने बताएका छन् । उनीहरुले आफ्नो अधिकांश समय उत्तर अमेरिकामा बिताउनेछन् भने ह्यारीले आफ्नो सैन्य जीवनबाट समेत राजिनामा दिनेछन् । उनीहरुले बेलायती महारानीको औपचारिक प्रतिनिधित्व पनि गर्ने छैनन् । ह्यारी दम्पतिको सुरक्षा प्रबन्धबारे अझै प्रष्ट पारिएको छैन् ।
गोर्खा सैनिकसंग निकट रहेका राजकुमार ह्यारी महाभूकम्प लगत्तै नेपाल पुगेर त्यहांको पुनर्निर्माणमा समेत जुटेका थिए । अफगानिस्तानमा रहंदा राजकुमार ह्यारीले गोर्खालीहरुको इमान्दारिता, साहस तथा निस्वार्थ त्यागको खुलेर प्रशंसा गरेका थिए । विश्वमा नै उदाहरणीय र लोकप्रिय रहेको बेलायती राजसंस्थामा राजपरिवारको वरिष्ठ सदस्यको भूमिकाबाट अलग रहने उनीहरुको निर्णयले खासै असर नपुग्ने विज्ञहरुले बताएका छन् । यद्यपि उनीहरुले गरेको यस्तो किसिमको निर्णयले भने सबैलाई आश्चर्यचकित पारेको छ । यहि जनवरी ३१ बाट बेलायत युरोपीयन युनियनबाट पनि अलग्गिने तयारीमा छ ।
फोटो अनलाइन
