डोटी : डोटीमा बस दुर्घटना हुँदा ३० जना घाइते भएका छन्। कञ्चनपुरको महेन्द्रनगरबाट बाजुरा जाँदै गरेको ना ७ ख ६१८१ नम्बरको महाकाली यातायातको रात्रीकालिन बस शनिबार बिहान साढे चार बजे डोटीको शिखर नगरपालिका-१ गेरुपानीमा दुर्घटना भएको जिल्ला प्रहरी कार्यालय डोटीले जानकारी दिएको छ।
घाइतेमध्ये ११/१२ जनाको अवस्था गम्भीर रहेको जिल्ला प्रहरी कार्यालयका सूचना अधिकारी इन्सपेक्टर कर्ण बहादुर बोहराले जानकारी दिए। बस सडकबाट करिब ३५ मिटर तल खेतमा खसेको छ।
घाइतेको नेपाल प्रहरी, सशस्त्र प्रहरी र स्थानीयले उद्दार गरेका छन्। उनीहरुको शैलेश्वरी अस्पताल दिपायल र सुजङ अस्पताल राजपुरमा उपचार भइरहेको छ। बसमा कति जना सवार थिए र कसरी दुर्घटना भयो खुल्न बाँकी रहेकाले अनुसन्धान भइरहेको प्रहरीले जनाएको छ।
अन्नपूर्ण पोष्ट