Home > Blog > १२ वर्षअघिको हत्यामा सांसद आलम पक्राउ

१२ वर्षअघिको हत्यामा सांसद आलम पक्राउ

Listen Gurkha Radio (गोर्खा रेडियो सुन्नुहोस)

गौर : १२ वर्षअघि इँटाभट्टामा जलाएर दुईजनाको हत्या गरेको अभियोग लागेका सांसद मो अफताब आलमलाई आइतबार प्रहरीले पक्राउ गरेको छ । सर्वाेच्च अदालतले उनलाई नियन्त्रणमा लिई ‘कानुनी कारबाही गर्न’ ७ वर्षअघि आदेश दिएको थियो । त्यसयता उनी दुईपटक संसद् सदस्यमा प्रतिस्पर्धा गरिसके । २०७० मा हारे र २०७४ मा जिते ।

सर्वोच्चको आदेश फैसला कार्यान्वयन निर्देशनालयले जिल्ला प्रहरी कार्यालय, रौतहटलाई पक्रन पटक–पटक आदेश दिँदै आएको थियो । पद र सत्ताको प्रभावमा उनी बच्दै आएका थिए ।

रौतहट–२ बाट प्रतिनिधिसभामा निर्वाचित आलम आइतबार बिहान पिप्राभगवानपुरमा पक्राउ परेका हुन् । भारतीय नम्बरको बीआर ०६ पिई १२०२ नम्बरको गाडीमा उनी वैवाहिक कार्यक्रममा जाँदै थिए । गौर–चन्द्रपुर सडक खण्डको इद्रिसगेट नजिकै प्रहरीले समातेको हो । उनलाई जिल्ला प्रहरी कार्यालयमा राखिएको छ । जिल्ला अदालतबाट आइतबार म्याद थप गरी अनुसन्धान प्रक्रिया अगाडि बढाइने जिल्ला प्रहरी कार्यालय रौतहटका प्रहरी प्रवक्ता डीएसपी नवीन कार्कीले बताए ।

२०६४ मा भएको पहिलो संविधानसभा चुनावको अघिल्लो रात चैत २७ मा भएको बम विस्फोटमा घाइते भएका युवालाई जलाएर हत्या गरेको घटनाका आरोपी उनलाई प्रहरीले पक्राउ गरेको हो ।

पूर्वमन्त्री शेख इद्रिसको पुरानो घरमा बम विस्फोट हुँदा पिन्टु भन्ने २४ वर्षीय त्रिलोकप्रताप सिंह र अर्का २२ वर्र्षका ओसी अख्तर ज्यान गएको थियो । राजपुर गाउँ नजिकैको इँट्टाभट्टामा जलाएर प्रमाण नष्ट गरेको भन्दै २०६५ वैशाख ९ मा पिन्टुका बाबु श्रीनारायण सिंह र ओसी अख्तरकी आमा रोक्साना खातुनले सांसद आलम, उनका भाइ महताबसहित मोबिन आलम, शेख भदई र शेख सवेजविरुद्ध किटानी जाहेरी दिएका थिए । पीडित परिवारको जाहेरीपछि २०६५ असार ३० मा महान्यायाधिवक्ता कार्यालयले रोक्साना खातुन वादी रहेको मुद्दामा कोहीमाथि मुद्दा नचलाउने निर्णय गरेको थियो । महान्यायाधिवक्ताको कार्यालयले मुद्दा नचलाउने निर्णयपछि पीडित श्रीनारायण सिंहले सर्वोच्च अदालतमा पुनरावेदन गरेका थिए । सर्वाेच्चले २०६९ जेठ १६ मा मुद्दाको गम्भीरतापूर्वक अनुसन्धान गरी ‘प्रचलित कानुनबमोजिम’ कारबाही गर्ने आदेश दिएको थियो ।

अदालतको आदेश नमानेको भन्दै पीडित पक्षले २०७३ मा जिल्ला प्रहरी कार्यालय रौतहटविरुद्ध मानहानि मुद्दा दर्ता गराएका थिए । निर्देशनालयले २०७५ चैत ८ मा जिल्ला प्रहरी कार्यालयलाई ताकेता गर्दै मुद्दाको अनुसन्धान गर्न पत्राचार गरेपछि घटनाका मुख्य आरोपी सांसद आलमलाई प्रहरीले पक्राउ गरेको हो । सर्वोच्चको आदेशअनुसार आलमलाई कर्तव्य ज्यान मुद्दामा अनुसन्धान गर्न पक्राउ गरिएको डीएसपी कार्कीले जानकारी दिए । अन्य आरोपी फरार छन् ।

बमकाण्ड घटना के हो ?

२०६४ को पहिलो संविधानसभा चुनाव चैत्र २८ गते हुँदै थियो । अघिल्लो दिन २७ गते राति राजपुर फरदवाकोमा बम विस्फोट भयो । चुनावमा बुथ कब्जा गर्न ल्याइएका बम विस्फोटन भएको र सोही विस्फोटनमा करिब दुई दर्जन मानिस घाइते भएको दाबी गरिएको छ । आपराधिक गतिविधिमा संलग्न धेरै भारतीयलाई पैसा दिएर प्रयोग गरेको उनीमाथि आरोप छ ।

घटना लुकाउन विस्फोटमा मारिएका तथा घाइते भएकाहरूलाई गाउँ नजिकैको आफन्तको इँटाभट्टामा जलाएको पीडित पक्षको दाबी छ ।

घटनामा आफन्त मारिएको भन्दै यमुनामाई गाउँपालिका–४ का सिंह र खातुनले नेता आलमसहित ५ जनाविरुद्ध प्रहरीमा किटानी जाहेरी दिएका थिए । विस्फोटबाट क्षति पुगेको खपटाले छाएको घर राति नै मर्मत गरिएको थियो । मृतक तथा घाइतेलाई जलाइएको भनिएको इँटाभट्टा घटनाको केही वर्षपछि बन्द भएको थियो । अहिले सो स्थानमा धानखेती छ ।

जाहेरवालामा न्यायको आश

दुईजना जाहेरवालामध्ये रोक्साना खातुनको २०६७ माघमा हत्या भइसकेको छ । छोराको हत्यारामाथि कारबाहीको गर्न मागसहितको उजुरी लिएर भौँतारिएकी खातुनको गाउँनजिकै उखुबारीमा शव फेला परेको थियो ।

छोराका हत्यारामाथि कारबाही माग गर्दै आएका श्रीनारायण सिंहले १२ वर्षमा न्याय फर्किएको प्रतिक्रिया दिएका छन् । ‘कानुन छ भन्ने विश्वास हराइसकेको थियो, आलम पक्राउपछि आशा पलायो । अब न्याय पाइन्छ कि !’, उनले भने ।

को हुन् अफताव आलम

राजपुर फरदवाका ५२ वर्षीय मो अफताव आलम काका शेख इद्रिसको प्रभावबाट राजनीतिमा प्रवेश गरेका हुन् ।

आलम ०५४ सालमा भौतिक योजना तथा निर्माण सहायकमन्त्री, २०५७ मा वनमन्त्री, २०५८ मा भूमि सुधार र २०६५ मा श्रम तथा यातायातमन्त्री भएका थिए । आलम कांग्रेसका पूर्वकेन्द्रीय सदस्य तथा रौतहट जिल्लाका पूर्वसभापति हुन् ।

सांसद पक्राउको विरोधमा प्रदर्शन

रौतहट कांग्रेस सभापति कृष्ण यादवले सांसद आलम पक्राउको घटनाप्रति खेद प्रकट गर्दै उनको अविलम्ब रिहा गर्न माग गरेका छन् । आलमलाई रिहा नगरे सरकारविरुद्ध चरणबद्ध आन्दोलन गर्ने चेतावनी सभापति यादवले दिएका छन् ।

आलम पक्राउ भएलगत्तै कांग्रेस कार्यकर्ताले दिउँसो जिल्ला प्रहरी कार्यालय रौतहटअगाडि घेराउ गरी प्रदर्शन गरेका छन् । प्रतिपक्षी दलका नेता सिध्याउने खेलमा सरकार लागेको भन्दै त्यसको विरोध गर्ने सभापति यादवले बताए ।

कांग्रेस जिल्ला कार्यसमितिले आयोजना गरेको चियापान कार्यक्रम समेत सांसद आलम पक्राउ परेपछि बिथोलिएको छ । कांग्रेस कार्यकर्ताले गौर–चन्द्रपुर सडकखण्डको ठाउँठाउँमा विरोध प्रर्दशन गरेका छन् ।

संसद्लाई पक्राउको जानकारी

प्रहरीले सांसद आलमलाई पक्राउ गर्नुअघि उपसभामुख शिवमाया तुम्बाहाम्फेलाई टेलिफोनमार्फत जानकारी गराएको थियो । सभामुख पद खाली भएकाले प्रहरीले उपसभामुख तुम्बाहाम्फेलाई जानकारी गराएको थियो । बहालवाला सांसदलाई पक्राउ गर्नुअघि सभामुखलाई जानकारी गराउनुपर्ने संसद् नियमावलीमा व्यवस्था छ ।

आइतबार नै प्रहरीले आलम पक्राउ गरेको लिखित पत्र पठाएका कारण संसद् सचिवालयले यससम्बन्धी सूचना सोमबार टाँस गर्ने तयारी गरेको छ । फौजदारी अभियोगमा पक्राउ पर्ने सांसदको तलब, सुविधा स्थगन हुने व्यवस्था छ ।
अन्नपूर्ण पोष्ट

गोर्खा अनलाईन रेडियो सुन्नको लागि IOS प्रयोगकर्ता हरुले यहाँ क्लिक गर्नुहोलाANDROID तथा कुनै पनि साधनबाट सुन्नको लागि यहाँ क्लिक गर्नुहोला । यदि हामीलाई सम्पर्क गर्न चाहनुहुन्छ भने यहाँ क्लिक गर्नुहोला । साथै तलका मोबाईल एप्लिकेशनबाट पनि सुन्न सक्नुहुनेछ Untitled-1