गोर्खा अनलाइन रेडियो यूके,
दशैं तिमी पक्का नेपाली हौ
नेपाली मनको खास पर्व हौ
मौलिकताको अनुपम उदाहरण हौ
नेपालीको पहिचान हौ
सबैको सुख सम्वृद्धिको आशा हौ
दशैँ तिमी हामी सबैको साझा हौ
दशैं तिमी धर्म हौ
हाम्रो संस्कृती हौ
हाम्रो महान पर्व हौ
सबैको लागि गर्व हौ ।
ठूला बडाको आशिर्वाद लिने
आफन्त सबैलाई भेट गराउने
साना ठूला सबैलाई मानमर्यादा गर्ने
सबैको मनमा उमंग जगाउने
सुख दुख जे भएपनि खुसी मनाउने
टिकाले निधार सजाउने
जमाराले शोभायमान बनाउने
सबैलाई उत्तिकै हर्ष उल्लास दिने
दशैँ तिमी सबैको उत्तिकै प्यारो छौ ।
मठ मन्दिर गयो तिमी भेट हुन्छौ
बाटोघाटो, सडक र राजमार्गमा तिमी देखिन्छौ
सुनसान गाउँ घरमा पनि तिमी नै हुन्छौ
शहर बजारको के कुरा गर्नु
एक महिना अघि नै तिमी झुल्किन्छौ
जता गयो, जहाँ गयो
दशैं तिमी उतै भेटिंछौ ।
कसैको लागि नयाँ लुगा बनेर
कसैको लागि उपहार बनेर
कसैको लागि आशिर्वाद बनेर
कसैको लागि टिका र जमरा बनेर
कसैको लागि लिङ्गे पिङ्गको अनुभूती बनेर
कसैको लागि परदेशबाट स्वदेशको यात्रा बनेर
दशैँ तिमी आफ्नो पहिचान देखाउँछौ ।
दशैं आउने र जाने मात्र हैन
हर्ष र उमंगको सम्झना पनि हो
आफ्नोपनको अनुभूति पनि हो
दशैँ तपाई हामी सबैको पर्व पनि हो ।
– डा बच्चु कैलाश कैनी
१२ असोज २०७६ (२९ सेप्टेम्बर २०१९)
डार्टफोर्ड, बेलायत ।
फेसबुक साभार,
