काठमाडौँ । प्रधानमन्त्री केपी शर्मा ओलीको जन्मस्थान तेह्रथुमको आठराई गाउँपालिकाका प्रतिनिधिले गाउँपालिकास्थित चुहानडाँडामा विमानस्थल निर्माणको माग गरेका छन् ।
प्रधानमन्त्री निवास बालुवाटारमा आठराईमा नै बसोबास गरिरहेका तथा झापा र काठमाडौँमा बस्ने आठराईवासीले विमानस्थल निर्माणको माग गरेका हुन । प्रदेशसभा सदस्य तेजमान कङ्दङ्वालगायतको टोलीले त्यहाँ रहेको खानेपानीको समस्यासमेत प्रधानमन्त्री ओलीलाई अवगत गरायो । आठराईकै एक विद्यालयमा पूर्वप्रधानाध्यापक आरसी थपलियाले जतासुकै मोटरबाटो खनेपछि पानीको अभाव रहेको बताए । उनले भने, “सडकले पानीको मूललाई धक्का दियो र मूलहरु अन्तै सरिरहेका छन् ।”
सो अवसरमा प्रधानमन्त्री ओलीले आठराईवासीलाई विमानस्थल निर्माणको योजना सरकारको नीति कार्यक्रममा आइसकेको बताउँदै सुकेपोखरी दोभान हुँदै तेल्लाबुङसम्मको सडकका लागि पनि रकमको व्यवस्था गरिएको जानकारी दिए । बाल्यकालमा आफूले देखेका बाटो, धारो, चौरलगायतको अवस्थाका बारेमा पनि उनले जानकारी लिएको प्रधानमन्त्रीका प्रेस संयोजक चेतन अधिकारीले जानकारी दिए।
डिसी नेपाल
