गोर्खा अनलाइन रेडियो यूके,
लन्डन । बेलायतको सबैभन्दा पूरानो सामाजिक संस्था ‘यती नेपाली एसोसिएसन यूके’ को नयां नेतृत्वमा वरिष्ठ समाजसेवी एवं व्यवसायी ध्रुव केसी निर्विरोध रुपमा निर्वाचित भएका छन् । आइतबार लन्डनस्थित गोल्डेनसीप रेष्टुरेन्टमा सम्पन्न अधिवेशनले केसीलाई २९ औं कार्यसमितिका लागि निर्विरोध अध्यक्ष चुनेको हो । सन् १९७४ मा लन्डन आएका केसीले सन् १९८२ देखि यतीको सामाजिक सचिव, कोषाध्यक्ष, ७ वर्ष महासचिव र ५ वर्ष उपाध्यक्ष भएर काम गरिसकेका छन भने २१ वर्ष नेपाल पर्यटन बोर्डको यूके दूत भएर काम गरे भने उनी नेपलिज क्याटरिङ एसोसिएसन यूकेका संस्थापक अध्यक्ष पनि हुन् ।
अधिवेशनले वरिष्ठ उपाध्यक्षमा बाचस्पति रेग्मी, उपाध्यक्ष जीवन सेन, महासचिव डा. मुकुन्द बास्तोला, सह-महासचिव कृष्ण पौडेल, कोषाध्यक्ष देव गुरुङ, सामाजिक सचिव जित रानाभाट, सांस्कृतिक सचिव माया केसी, प्रकाशन सचिव काशीराज बोहोरा र सदस्यमा तिलक भट्टराई चयन गरेको छ । अन्य रिक्त रहेका ६ सदस्यहरु भने निकट भविष्यमा थप गरिने बताइएको छ । अधिवेशनले तीन संरक्षक र ११ जना सल्लाहकार राख्ने व्यवस्था र अध्यक्षमा उठ्न एक कार्यकाल काम गरेको हुनुपर्ने विधान संशोधन गरेको छ। संस्थामा जम्मा ९७ जना साधारण सदस्य छन् । कार्यक्रममा निवर्तमान अध्यक्ष शशीधर नेपालले आफ्नो कार्यसमिति, निर्वाचन समिति र अधिवेशन सम्पन्न गराउन खटिने समाजसेवी अग्रहजहरु मदन थापा, रामशरण सिम्खडा, हरि केसी, सोलिसिटर राजु थापा, चित्रबहादुर गुरुङ लगायतलाई धन्यवाद दिएका थिए ।नवनिर्वाचित अध्यक्ष केसीले यतीले विगतमा मनाउने गरेको मुख्य चाडपर्व, खेलकुद, च्यारिटी गतिविधिलाई निरन्तरता दिंदै विभिन्न सामाजिक कार्यलाइ जोड दिने बताएका छन् । युरोपकै पूरानो संस्थाको रुपमा रहेको संस्था पछिल्लो समयमा ओझेलमा परेको महसुस बेलायातवासीले गरेका छन् । नयां नेतृत्वले समाजलाई अगाडी बढाउन महत्वपूर्ण भूमिका खेल्ने सबैको चासो रहेको छ । सन् १९६० मा स्थापना गरिएको यस संस्थाका संस्थापक अध्यक्ष वरिष्ठ राजनीतिज्ञ पशुपति शमशेर जबरा हुन् ।यती एसोसिएसन यूके’ को निर्वाचन गराउन निर्वाचन समिति संयोजक आर के त्रिपाठी, सदस्यहरु उमेशराज मोक्तान र क्याप्टेन रत्न श्रेष्ठले पहल गरेका थिए । फोटो शिव भण्डारी