काठमाडौं। प्रधानमन्त्री केपी ओली हावाहुरीबाट प्रभावित बारा जिल्ला जाने भएका छन्। प्रधानमन्त्री ओलीले आफ्नो गृह जिल्ला झापाको सम्पूर्ण कार्यक्रम स्थगित गरेर बारा जाने कार्यक्रम तय भएको प्रधानमन्त्रीका प्रेस संयोजक चेतन अधिकारीले जानकारी दिए।
आइतबार राति आएको हावा हुरीले बारामा ठूलो जनधनको क्षति भएको छ। प्रहरीका अनुसार बारमा हालसम्म २६ जनाको मृत्यु भइसकेको छ भने मृतकको संख्या बढ्न सक्ने अनुमान गरिएको छ। बारा र पर्सामा भएको जनधनको क्षतिपछि प्रधानमन्त्रीले झापाको सम्पूर्ण कार्यक्रम स्थगित गरी बारा जान लागेको प्रेस संयोजक अधिकारीले जानकारी दिए।
उनका अनुसार प्रधानमन्त्री ओली हेलिकप्टरमार्फत बारा जाँदैछन्। प्रधानमन्त्री ओली मोरङ र झापाका विभिन्न कार्यक्रममा सहभागी हुन आइतबार त्यसतर्फ प्रस्थान गरेका थिए। तर हावा हुरीले बारा र पर्सामा ठूलो जनधनको क्षति भएपछि प्रधानमन्त्री ओली आफ्नो सम्पूर्ण कार्यक्रम स्थगित गरेर बारातर्फ जान लागेका हुन्।
डिसी नेपाल
