गोर्खा अनलाइन रेडियो यूके,

लन्डन, महिनौंदेखि घमाइलो रहँदै आएको लन्डनको मौसम एक्कासी सिमसिमे झरीमा परिवर्तन हुँदा पनि बेलायतवासी नेपालीहरुलाई नेपाली मेलामा उपस्थिति हुनको लागि खासै असर पारेन । २६ अगष्ट आइतवार, लण्डनको केम्पटन पार्कमा तमुधिं यूकेले आयोजना गरेको मिनी नेपालको नामले परिचित नेपाली मेलामा पानीमा रुझ्दै भिज्दै र छाता ओढेर भएपनि नेपालीहरुको उल्लेख्य नेपालीहरुको रहेको थियो । बेलायतमा नेपालीहरुद्वारा आयोजना गरिने कार्यक्रमहरु अन्तर्गत गोर्खा कप पछिको अर्को ठूलो कार्यक्रममा नेपाली मेला पर्दछ । सन् २००९ देखि शुरु भएको नेपाली मेलाले एक दशक पूरा गरिसकेको छ । विभिन्न नेपाली संघसंस्था लगायत नेपाली दूतावासको सहकार्यमा हुँदै आएको उक्त नेपाली मेलाको प्रमुख उद्देश्य भावी पुस्तामाझ नेपाली भाषा,कला र संस्कृतिलाई निरन्तरता दिनु र विदेशमा नेपाली परिवेशलाई प्रदर्शन गर्नु रहेको छ । नेपाली मेलामा यसपटक गत वर्षको भन्दा पनि बढि ३७ वटा सांस्कृतिक झांकीहरु प्रस्तुत गरिएको थियो । जसमध्ये विगतका २ वर्षको विजेता लमजुङ समाज यूकेले यसपटक पुनः सर्वोत्कृष्ट बन्दै लगातार तीन पटक एम्बासडर कप जितेर ह्याट्रिक गरेको छ । झांकीतर्फ सिक्लेस पर्चे समाज यूके दोस्रो र श्री मेश्राम बरम घान्द्रुक वेलफेयर सोसाइटी तेस्रो स्थानमा आउन सफल भए । सांस्कृतिक नृत्यको प्रस्तुतितर्फ भने घान्द्रुक वेलफेयर सोसाइटी यूके प्रथम, लमजुङ समाज यूके दोस्रो र सिक्लेस पर्चे समाज यूके तेस्रो बने । कार्यक्रमको पहिलो औपचारिक चरणमा शुभकामना मन्तव्य दिदैं कार्यक्रमका प्रमुख अतिथी बेलायतका लागि नेपाली राजदूत डा दुगाृबहादुर सुवेदीले मेलाले बेलायतबासी नेपालीहरुलाई एकताको सुत्रमा बांध्ने काम गरेको धारण व्यक्त गरे । तमु धिं यूके अध्यक्ष ज्ञाम गुरुङले नेपाली मेला बेलायतका सबै नेपालीको साझा मेला बन्न सफल भएको बताए । त्यसअवसरमा मेलाका लागि उपराष्ट्रपति नन्दकिशोर पुन, पर्यटनमन्त्री रविन्द्र अधिकारी र तमु धि यूके संरक्षक एवम गैरआवासीय नेपाली संघका पूर्व अध्यक्ष शेष घलेले पठाएका भीडीयो शुभकामना देखाइएको थियो । तमु धि युकेका उपाध्यक्ष तथा मेला संयोजक हितकाजी गुरुङले स्वागत मन्तव्य दिएका थिए भने महासचिव कृष्ण गुरुङले कार्यक्रम सञ्चालन गरेका थिए । कार्यक्रममा बेलायतस्थित विभिन्न कुटनितिक नियोगका प्रतिनिधी, स्थानीय मेयर, काउन्सिलरहरुका साथै नेपाली संघसंस्थाका प्रतिनिधीहरुको अतिथीका रुपमा उपस्थिति थियो । फोटो हेर्न यहाँ क्लिक गर्नुहोला