काठमाडौं । त्रिभुवन अन्तर्राष्ट्रिय विमानस्थलमा आज ११ अन्तर्राष्ट्रिय उडान भएका छन् । विभिन्न मुलुकमा अलपत्र नेपालीको उद्धारका लागि गरिएका यी उडानमार्फत एक हजार १ सय ७७ नेपाली स्वदेश फर्किएका छन् ।
आज नेपाल वायुसेवा निगम (नेपाल एयरलाइन्स) ले मलेसियाको क्वालालम्पुरबाट १ सय ४८, साउदी अरेबियाको रियादबाट २ सय ५२ र कुवेतबाट १ सय ४९ यात्रु काठमाडौँ ल्याएको छ ।
दुबई र दोहाबाट थप नेपाली ल्याउन निगमको जहाज त्यसतर्फ प्रस्थान गरेको विमानस्थलले जनाएको छ ।
त्यस्तै हिमालय एयरलाइन्सले दमामबाट १ सय ५४ र अबुधाबीबाट १ सय ५५ नेपालीको उद्धार उडान गरी स्वदेश फर्काएको छ ।
सोही एयरलाइन्सको जहाज थप नेपाली ल्याउन दोहा प्रस्थान गरेको विमानस्थल कार्यालयले विज्ञप्तिमार्फत जनाएको छ । जजिरा एयरलाइन्सले कुवेतबाट १ सय ६० यात्रु काठमाडौँ ल्याएको छ ।
कुवेतबाट यात्रु ल्याउन पुनः त्यसतर्फ उडेको विमानस्थलले जनाएको छ । शुक्रबार पनि ११ अन्तर्राष्ट्रिय चार्टर्ड उडानबाट ८ सय ७७ नेपाली स्वदेश फर्किएका थिए ।
आज आन्तरिकतर्फ पनि विभिन्न एयरलाइन्सका आठ चार्टर्ड उडान भएको विमानस्थलले जनाएको छ ।
नेपाल वायुसेवा निगम ९नेपाल एयरलाइन्स र हिमालय एयरलाइन्ससहित विदेशका कतार, जजिरा, टर्किसलगायत एयरलाइन्सले नेपालीलाई स्वदेश फर्काउन विभिन्न मुलुकका चार्टर्ड उडान गरिरहेका छन् ।
